Білім • 23 Мамыр, 2023

305 мың өтініш қабылданды

115 рет
көрсетілді
6 мин
оқу үшін

18 мамырда негізгі ұлттық бірыңғай тестілеу басталғанын хабарлаған едік. Ол 5 шілдеге дейін жалғасады. 166 мың талапкер екі мүмкіндікті есепке алғанда 305 мың өтініш берген. Оның ішінде тапсырушылардың 75 пайызы – қазақ тілінде, 25 пайызы орыс тілінде, 243 адам ағылшын тілінде тестілеуден өтуге өтініш білдіріпті.

305 мың өтініш қабылданды

– Осы жылдан бастап барлық талапкерге ұлттық бірыңғай тесті­леуден өтуге байланысты ерек­ше мүмкіндік беріп отырмыз. Енді негізгі ҰБТ-ны екі рет тапсырып, ең жақсы нәтижемен грант конкурсына қатысуға мүмкіндік бар. Біз кедергісіз білім беруге ниеттіміз. Талапкерлердің сапалы білім алып, өз әлеуетін толық ашу үшін мүмкіндік жасаймыз, – деді Астана қаласында орналасқан тестілеу орталығына барып, ҰБТ-ның өту барысымен танысқан Ғылым және жоғары білім министрі Саясат Нұрбек.

Еске сала кетейік, талапкер­лер өтініш беру барысында тесті­леу күнін, уақытын және орнын өздері таңдады. Бұл ретте олар екі мүмкіндік үшін бейін­дік пән­дер­дің бір ғана комбинациясын белгіледі. Комбинацияларға келетін бол­сақ, қазіргі таңда та­лап­керлердің 18 па­йызы – «Мате­ма­тика-Физика», 17 па­йызы – «Биология-Химия», 13 пайы­зы – «Шығармашылық», 10 пайызы «Ма­тема­тика-Информатика» пәндерін таңдаған.

счям

Тестілеу форматында өзгеріс жоқ. Пәндер саны өзгеріссіз қалады, яғни үш міндетті және екі бейіндік пән, барлығы 120 тест тапсырмасы. Алайда «Қазақ­стан тарихы» және «Оқу сауат­ты­лығы» пәндері бойынша тест тапсырмаларының санына өзге­ріс­тер енгізілді. Енді «Қазақ­стан тарихының» бір нұсқасында 20 тест тапсырмасы болады: 1-ден 10-ға дейін – бір дұрыс жауапты таңдауға арналған; 11-ден 20-ға дейін – контекстке негізделген бір дұрыс жауапты таңдауға арналған тест тапсырмалары (5 сұрақтан 2 контекстік мәтін). Сондай-ақ бұған дейін талапкерлерге оқу сауаттылығынан 20 тест тапсырмасы берілсе, енді 3 мәтін бойын­ша 15 тест сұрағы ұсынылады.

Осылайша, Қазақстан тарихы – 20, оқу сауаттылығы – 15, ма­те­­матикалық сауаттылық – 15 жә­не екі бейіндік пән бойынша 35 тест тапсырмасы ұсынылады. Ең жо­ғары ұпай – 140. Тестілеудің жал­пы уақыты – 4 сағат (240 ми­нут). Сонымен қатар ерекше білім беру қажеттіліктері бар ба­ла­ларға қосымша 40 минут қосы­лады.

ҰБТ тапсырмаларының құ­ры­лымында өзгерістер бар. Жауап­ты министрлік тест тапсыр­­маларындағы дистракторлар санын (жауап нұсқалары) қысқарту туралы шешім қабылда­ды. Бір дұрыс жауабы бар тест тапсырмаларында нұсқалар саны 5-тен 4-ке дейін, бір немесе бірне­ше дұрыс жауабы бар тест тапсырмаларында (үш дұрыс жауаптан көп емес) нұсқалар саны 8-ден 6-ға дейін азайды.

2022-2023 оқу жылынан бас­тап «Информатика» пәні ҰБТ-ның бейіндік пәндер ком­би­нациясының тізіміне енгі­зіл­ді. Осыған байланысты «Инфор­матика мұғалімдерін даярлау», «Ақпараттық технологиялар», «Ақпараттық қауіпсіздік» білім беру бағдарламаларының топтарына түсушілер «Матема­ти­ка-Информатика» ком­би­на­ция­­сы бойынша ҰБТ тапсырады.

– Академиялық адалдықты қам­тамасыз ету мақсатында «1 ком­пьютер – 2 камера – 1 тес­тіле­нуші» қағидаты сақта­лады. Сондай-ақ өткен жылдан бастап тест нұсқалары таңбалан­ғанын атап өткен жөн. Яғни ҰБТ-ға қа­тысушылардың әрқайсысының жеке тест нұсқасы болады. Со­ны­мен қатар калькулятор мен Мен­делеев кестесі компью­тер экранында көрсетіледі. Талап­керлердің пікірі мен қалауын ескере отырып, негізгі ҰБТ-да оларға Менделеев және тұз­дардың ерігіштік кестесінің қағаз нұсқасы беріледі. Тест тапсырушылар тес­тілеу аяқтал­ғаннан кейін 30 ми­­нут ішінде апелляцияға өті­ніш бере алады. Сертификат ап­е­лля­циялық комиссияның ше­ші­мінен кейін талапкердің жеке ка­бинетінде қолжетімді болады, – деп нақты­лады министр.

Шекті ұпай өзгерген жоқ: «Құқық» және «Педагогикалық ғылымдар» білім беру салалары үшін кемінде 75 ұпай, «Ден­саулық сақтау және әлеумет­тік қамтамасыз ету (медицина)» кемінде 70 ұпай, «Ауыл шаруа­шылығы және биоресурстар», «Ветеринария» кемінде 60 ұпай, ұлттық жоғары оқу орындарына түсу үшін кемінде 65 ұпай, басқа жоғары оқу орындарына кемінде 50 ұпай жинау керек.

Тестілеуге кіргізу кезінде металл ізде­гіш­тер пайдаланылады. Бұл талап­кер­лердің қауіпсіздігін қамта­ма­сыз етіп, ережелерді бұзу мен тыйым салынған заттарды (ұя­лы телефон, шпаргалка және т.б.) ішке кіргізбеу үшін қажет.

Тестілеу барысында ауди­то­рия­ның (компьютерлік сы­нып­тың) және бейне­бақы­лаудың ауданына байланысты рұқсат етілген магнит­тік тол­қын­дар шегін­де ұт­қыр және ра­дио­­электрон­­дық бай­ла­ныс сиг­нал­да­­рын «тұн­шық­тыратын» құрыл­ғылар қолда­нылады.

2023 жылғы ҰБТ аяқталған­нан кейін күнтізбелік жыл­дың 31 қа­занына дейін тестілеу­дің бейнежазбаларына талдау жүр­гізіледі. Тыйым салын­ған зат­тарды пайдалану не­месе ере­желерді бұзу факті­ле­рі анық­тал­ған жағдайда талап­кердің ҰБТ нәтижесі жойы­л­ады.

Ұлттық тестілеу орталығының басшысы Руслан Емелбаев атап өткендей, 2023 жылғы талапкерлер ҰБТ-ны бес рет тапсыру құқығына ие. Сынақтар қаңтар, нау­рыз, мамыр-маусым және тамыз айларында өтеді. Бұрын сынақ бір күнде өтетін, тиісінше дүрбелең де көп еді. Қазір мұның бәрі сап тыйылған.