Коллажды жасаған Қонысбай ШЕЖІМБАЙ, «EQ»
Тиісті орындар сауда саласында қызмет көрсететіндердің дені қосылған құн салығын төлеуші ретінде уақтылы тіркелмегендіктен осындай жағдайға ұшырап отырғанын айтады.
«Мен алтын бұйымдарын қарызға алып сатамын. Былтыр желтоқсан айында салынған 4,3 млн теңге айыппұлды несие алып, жедел жаптым. Енді биыл сәуірде 920 мың, артынша 27 млн теңгеге хабарлама келіп тұр. Осы миллиондаған қаржыны 3 ай ішінде төлеуім керек екен. Оны қалай жабамын? Мұндай көлемде маған несие де бермейді ғой», дейді мемлекеттік кірістер органынан ескертпе алғандардың бірі Рәзия Шаймағамбетова.
Кәсіпкерлер палатасының алаңында мемлекеттік кірістер органы мамандарының қатысуымен өткен «Ашық есік» күнінде қармақшылық кәсіпкер Бағила Несіпбаева да осындай арыз айтты. Саудамен айналысатын ерлі-зайыптылар осыған дейін салық пен өзге де төлемдерді кешіктірмей төлеп келген. Осыдан 2 жыл бұрын айналым қаражаты межеге жетіп қалғанын ескерткен салық маманының кеңесімен үш құрамдасты интеграцияланған жүйеге өткен. Осы жүйе бойынша барлық міндеттемені өтеуден қашқан кезі жоқ. Биыл жыл басында шақырған салықшылар қосымша құн салығын төлеуші ретінде тіркелуді ескертіп, соңғы екі жылға 25,7 млн теңге айыппұл салыпты
«Біз маман емеспіз. Бухгалтер ұстап отыруға жағдайымыз келмейтіндіктен де салық мамандарымен кеңесеміз. Енді соның зардабын тартып отырмыз. Ол ақшаны қайдан аламыз? Осы оқиғадан кейін жұбайым ауруханада жатыр», деді Бағила Несіпбаева.
Қызылорда қаласы бойынша мемлекеттік кірістер басқармасының бөлім басшысы Салтанат Ержанованың дерегінше, қосылған құн салығын төлеуші ретінде уақтылы тіркелмеген 84 кәсіпкерге айыппұл салынған. Палатадағы Өңірлік кеңес мүшесі Бейбітәлі Тілеулиевтің айтуынша, айыппұл салынғандардың басым бөлігі сауда саласындағы кіші бизнес өкілдері.
«Халық арасында салық мәдениетін қалыптастыру үшін ескертпе-хабарлама беру тәсілін де оңайлатқан жөн болар еді. Бухгалтері жоқ шағын кәсіпкерлер тоқсандық, жылдық есептерін бір реттік қызмет көрсететін мамандарға тапсыртады. Олардың көпшілігі жеке кабинетін үнемі ашып отырмайтыны анық. Сондықтан да салынған айыппұл туралы хабарламаларды SMS арқылы жіберген дұрыс», дейді ол.
Қазір облыста 67 мыңнан астам кәсіпкерлік субъекті тұрақты жұмыс істеп тұр. Осылардың 21 814-і сауда саласында тіркелген. Оларда өңірде жұмыспен қамтылғандардың 17,5 пайызы жұмыс істейді. Палатаға арызын айтып келген 7 кәсіпкер 23 адамға жұмыс тауып беріп отыр.
«Бизнес өкілдерін алаңдатқан бұл мәселе жыл басында облыс әкімінің бірінші орынбасары Серік Қожаниязовтың төрағалығымен өткен жұмыс тобында да қаралған еді. Сонда дәл осы проблема республика көлемінде 2 мың кәсіпкердің басында бар екені белгілі болған. Ал айыппұл салынғандар санының азаймауы бұл проблеманың әлеуметтік жағын ескеру керектігін аңғартып тұр. Бұл мәселе Үкіметтік деңгейде шешілуі керек», дейді Кәсіпкерлер палатасының директоры Пірмұхаммед Сыздықов.
Қызылорда облысы
