Көрме • 07 Маусым, 2023

Қолөнершілер қаласы

263 рет
көрсетілді
4 мин
оқу үшін

Тарихы мыңжылдықтармен сабақтасып жатқан Тараз өткен жылы дүниежүзілік қолөнершілер қаласының тізіміне енген болатын. Ықылым заманнан бері сауда-саттықтың ордасына айналған, қолөнер шеберлерінің таңдаулы туындыларымен байырғы дәуірде-ақ талайды тәнті еткен көне қалада ІІ «Тараз – қолөнершілер қаласы» халықаралық көрмесі ұйымдастырылды.

Қолөнершілер қаласы

Екінші жыл қатарынан ұйым­дастырылған халықаралық дең­гей­дегі іс-шараға сегіз елден кел­ген 250-ге жуық қолөнер шебер­лері қатысып, өздері жасаған бұйым­дарды әулиеаталық әлеуметтің назарына ұсынды.

«Қазақ пен қырғыз ежелден бауырлас халық екені белгілі. Бұл көрмеге біз де асығып жеттік. Ала­таудың арғы жағынан келген әріптестер киізден, жүннен тоқылған бұйымдарын алып кел­ді. Біздің шеберлердің қолынан шық­қан өнімдер жергілікті халық тарапынан зор қызығушылық тудырды. Сатып алғандар да жоқ емес.

вапр

Мұндай іс-шаралар жиі ұйым­дастырылып тұрса, ешкім ұтыл­майды. Бауырлас халықтар ара­сындағы қарым-қатынас нығая­­ды, қолөнер шеберлері өзара тәжіри­бе алмасып, жаңа бағыттарды меңгеруге мүмкіндік алады. Қыс­қасы, іс-шара баршамыз үшін тиімді екені даусыз», дейді Қырғыз Республикасы Жалал-Абад облысынан келген Тотықан Өскембаева өз ойымен бөлісіп.  Өңір басшысының бірін­ші орынбасары Нұржан Кален­де­ровтің айтуынша, өңірде қолға алын­ған мұндай ауқымды іс-шаралар Таразға туристерді тар­туға молынан мүмкіндік туғызады. Сондай-ақ шаһардың тарихи бет-бейнесін қалыптастыруға септігін тигізеді.

«Ұлы Жібек жолы бойында орналасқан Тараз ежелден сау­да мен қолөнердің орталығы са­налғаны әлімсақтан аян. Екі мың жылдан астам тарихы бар көне шаһар түркі мәдениетінің ажырамас бөлігі ретінде де мо­йындалған. Қысқасы, әулиеаталық әлеумет тарихы тереңде жатқан қаланың өткенімен мақтанады.

Өңірде туризм саласын өркен­детуге айрықша назар аударып отырмыз. Сол үшін де Әулиеата жерінде ауқымды іс-шаралар жиі ұйымдастырылып жатыр. Өйт­кені Жамбыл өңірінде туризмді дамытуға барлық мүмкіндіктер бар екеніне талас жоқ. Ал «Тараз – қолөнершілер қаласы» атты екінші халықаралық көрме қаланың тарихи бет-бейнесін қалыптастыруға мол мүмкіндік беретініне ешкім шүбә келтірмесе керек», дейді облыс әкімінің бірінші орынбасары Нұржан Календеров.

Бірнеше күнге созылған қол­өнер­шілер көрмесі жергілік­ті жұрт­шылықтың көңілінен шық­ты. Дүниежүзілік қолөнершілер ке­ңесі Азия-Тынық мұхиты айма­ғы­ның президенті Азиз Мұрта­заев­тың айтуынша, Таразда өткіз­ген халықаралық көрмеден елі­міздегі өзге шаһарлардың билігі үлгі алуы керек.

Тараз төрінде ұйымдас­ты­рыл­ған көрмеге еріктілер де бел­сенді түрде атсалысты. Олар алыс-жа­қын шет мемлекеттерден келген мәртебелі меймандарға қолдан кел­­ген көмегін аянған жоқ.

«Өңірде екінші рет өткізілген халықаралық көрменің жоғары деңгейде ұйымдастырылуы үшін «Аспара» колледжі барынша қол­ұшын берді. Биыл іс-шараның географиясы да кеңи түскен. Азия­дан бөлек, Еуропа елдерінен кел­ген 250-ге жетеғабыл қолөнерші­нің көне шаһарда бас қосқаны – сөзі­мізге дәлел.

Өңірге ат басын бұрған шетел­дік­тердің ішінен үндістандық қол­­өнер шеберіне көмектестім. Жер­­гілікті халық отандық шебер­лер­мен қатар шетелдік азамат­тар­дың бұйымдарын сатып алып жат­ты. Көбінесе білезік секілді нәзік жандыларға арналған бұйым­дар­дың жедел өткенін байқадым», дей­ді еріктілердің бірі Балауса Тұрар.

Бірнеше күнге созылған халық­аралық көрме аясында Таразда кәдесый өнімдерінің жәрмеңкесі, қолөнер шеберлерінің шеберлік сағаты, жас суретшілер арасында байқау ұйымдастырылды. Сондай-ақ Тараз топырағына табан тіреген мәртебелі меймандар көне шаһардың көрікті жерлерін аралап, тарихымен танысты.

 

ТАРАЗ