Қаржылық мониторинг агенттігі Атырау облысы бойынша экономикалық тергеп-тексеру департаментінің штаб бастығы Бекболат Әнесовтің айтуынша, жыл басынан бері қаржы пирамидасын құруға байланысты 3 дерек анықталған.
«Департамент қызметкерлері тұрғындарды алдап-арбаудың алдын алу үшін мониторинг жүргізіп келеді. Мониторингтің нәтижесінде биылғы бес айда қаржы пирамидасына қатысты 3 дерек әшкереленіп отыр. Қазір «Chia Tai Tianging» және «InCruises» ЖШС-ға қатысты қаржылық (инвестициялық) пирамиданы құру және оған басшылық ету дерегімен қозғалған қылмыстық іс тергеліп жатыр», деп мәлім етті Бекболат Әнесов.
Оның айтуына қарағанда, Қаржылық мониторинг агенттігі қаржы пирамидасы ретінде әрекет ету күдігіне ілінген, сондай-ақ сот үкімі шыққан ұйымдардың кеңейтілген тізімін жария еткен.
«Осыған байланысты облыс тұрғындары мен қонақтарынан туысқандары, не жақын таныстары қаржы пирамидасының әрекетінен зардап шексе, Атырау облысы бойынша экономикалық тергеп-тексеру департаментіне хабарласу сұралады. Азаматтарды қырағы болуға, ақшалай жинағын күмәнді қаржы институттарына салмауға шақырамыз», деді Б. Әнесов.
