Елорда • 10 Шілде, 2023

Асық алаңы ашылды

243 рет
көрсетілді
2 мин
оқу үшін

Астананың 25 жылдығына орай қала тұрғындары мен қонақтарына тамаша тарту жасалды. Елорданың Сарыарқа, Алматы, Есіл аудандарында асық ойнайтын алаң ашылды.

Асық алаңы ашылды

Асық ату – халқымызбен бірге көнеден келе жатқан ұлттық ойындарымыздың бір түрі. Асықты жылдың төрт мезгілінде ойнауға болады. Бұл ойын – адамды дәлдікке, мергендікке, шапшаңдыққа, ұстамдылыққа, алғырлыққа тәрбиелейді. Медицина жағынан да пайдасы бар.

Сарыарқа ауданындағы «Гүлдер» саябағында орналасқан алаңның ашылуын­­­да алғашқы болып сөз алған атал­­­ған ауданның әкімі Бауыржан Ералы бала күнінен асық ойнап өскенін айтты.

«Қазір гаджеттің неше түрі дамыған заманда балаларды асық ойнауға үйретуіміз керек. Бұл алаң Respublica партиясының бастамасымен ашылып отыр. Асықты кез келген жастағы адам ой­найды. Сондықтан осы жаңа алаң ар­қы­лы елордада асық ойнайтын жастар қа­уымы қалыптасады деп сенемін», деді ол.

Одан кейін игілікті істің жүзеге асуына мұрындық болған Respublica партиясының төрағасы, Мәжіліс депутаты Айдарбек Қожаназаров ұлттық құндылықтарды дамыту туралы айта келіп, алда еліміздің басқа өңірлерінен асық ойнайтын алаңдар ашуды жоспарлап отырғанын жеткізді.

Сондай-ақ дәл осындай алаң елор­даның Алматы ауданындағы «Сту­денттік» саябақ пен Есіл ауданының «ЭКСПО» аумағындағы «Тәуелсіздіктің 25 жылдығы монументінің» алаңынан ашылды. Жаңа алаңдардың ерекшелігі – асық атудың тарихы және ойын түрлері мен ережелері туралы ақпаратты арнайы енгізілген QR-код арқылы білуге болады.

Астана қалалық Асық ату федерация­сының басшысы, аға жаттықтырушы Ескендір Рахметов кейінгі жылдары ел­ор­дада асық ату спортына қызығу­шы­лар­дың қатары көбейгенін тілге тиек етті.

«Біздің қалалық федерацияда 40-тан астам спортшы тіркелген. Олардың арасында әлемдік деңгейдегі халықаралық жарыстарда топ жарған чемпиондар бар. Сонымен бірге олар ұлттық ойындарға төрешілік жасайды. Асықты алты жас­та­ғы баладан, алпыстағы азаматқа дейін ойнайды. Бүгін бас қалада асық ойнайтын алаңдар ашылғанына қуанып тұрмын. Бұл өте керек. Осыны іске асыр­­ған аза­мат­тарға ризашылығымды біл­ді­ре­мін», дейді федерация басшысы.

Осы күні іс-шараға қатысушылар да асық ойнап, мергендік танытты.