Аймақтар • 14 Шілде, 2023

Кенеден келер қауіп көп

188 рет
көрсетілді
2 мин
оқу үшін

Қызылордадағы өңірлік коммуникациялық орталығында брифинг өтіп, мамандар Конго-Қырым геморрагиялық қызбасының алдын алу бағытындағы шаралар туралы баяндады.

Кенеден келер қауіп көп

Биыл осы дерт шығуы мүм­кін деген 106 елді мекен анық­талып, қазір олардағы тұрғын үй аумақтары мен мал қораларына кенеге қарсы «Креолин Х» ері­тіндісі қолданылып отыр. Облыс әкімі аппаратының «Жұмылдыру және шұғыл жұмыстар орталығы» КММ директорының міндетін атқарушы Бауыржан Садықовтың айтуынша, көктемгі залалсыздандыру жұмыстарының орташа тиімділік көрсеткіші 97,2 пайызды құраған.

Жаңағы елді мекендерде 556 мың мал басы бар. Оның 117 мыңына препараттар егіліп, ауруға қарсы залалсызданды­ру жұ­­мыстары жүргізілді. Облыс­тық ветеринария басқар­масы жұмсалатын препараттар­ды жос­парға сәйкес алдыртып, кезең-кезеңімен аудандарға жөнелтіп жатыр.

Облыстық санитарлық-эпиде­миологиялық бақылау департа­менті басшысының орынбасары Әлия Әбдіқайымованың айтуынша, улаудан ада-күде кете қой­майтын кененің өршитін уа­қыты маусым мен шілде. Қазір қолайсыз деп танылған елді мекендерден басқа аумақтарда да қауіпті аурудың алдын алу шаралары тұрақты жүргізілуде. Ұлттық сараптама орталығы об­­­лыстық филиалының зерт­хана­сында 2 917 кене сынамасы зерт­теліп, жұқпалылық көр­сеткіші 6,5% болды.

Брифингте зиянкестерді бол­дырмауда кесе көлденең тұра­тын мәселелер де айтылмай қал­мады. Мысалы, жәндіктерді у­лау үшін тендерді жұмылдыру басқармасы өткізеді. Арнайы құ­рылған жұмыс тобы мердігер жұмысына дезинфекция кезінде тек мониторинг жасай алады. Тексеру жасауға ешқайсысының құзыреті жоқ. Ал оның зардабын бүгінгідей жағдай ушыға қалғанда жауапкершілікті кімнен сұрарын білмеген ел тартып жатады.

Соңғы жылдары осы мәсе­лені көтеріп келе жатқан маман­дар проблеманың шешімі зиян­кестерді улауды жергілікті ветеринария басқармасына беру екендігін айтады. Бұл жұмысты оңай әрі жедел ұйымдастыруға мүмкіндік беретін еді. Бірақ бұл үкіметтік деңгейде шешілетін мәселе.

Әйтеуір, биыл Сырдың бойын осы қансорғыш алабөтен буып тұр. Тоғызыншы шілде күні кене шаққан тағы бір тұрғын көз жұм­ды. Отыз екі жастағы бұл азамат та Шиелі ауданының тұр­ғыны. Бұл – осы жылы облыста улы жәндіктің құрбанына ай­налған үшінші адам.

Осымен тоқтаса екен...

 

ҚЫЗЫЛОРДА