Аймақтар • 17 Шілде, 2023

Алматыдағы саунада балалар лагері ұйымдастырылған

267 рет
көрсетілді
1 мин
оқу үшін

Алматыда халықтың әлеуметтік осал топтарына жататын отбасылардың балалары лагерьге тегін жолдама алған еді. Ақыр соңында лагерьге «жазғы демалысым әсерлі өтеді» деген оймен барған балалар сауна ғимаратында түнеген, деп хабарлайды Egemen.kz.

Алматыдағы саунада балалар лагері ұйымдастырылған

Бұл туралы лагерьге аттанған оқушының туысы Инка Рокеровна Facebook парақшасында жазды.

- «Арман дала» лагерінде келеңсіз жағдай болып жатыр. Халықтың әлеуметтік жағынан осал тобы санатындағы отбасылардың балалары тегін демалысқа жіберілді. Ұйымдастырушылар балалардың ұялы телефондарын алып қойған, ата-аналар балаларымен хабарласа алмаған. Мүлде желдетілмейтін ғимаратта 100 бала жатыр. Балалар еденде ұйықтап жатыр, деп жазды Инка Рокеровна.

Бұл оқиғаға басқа да ата-аналар куә болғанын жасырмады.

Алматы қалалық білім басқармасы келеңсіз жайтқа қатысты түсініктеме беріп, тиісті шаралар қабылданып жатқанын алға тартты.

«Білім басқармасының қызметкерлері шұғыл түрде «Арман дала» саяжайына барды. Қазір білім басқармасы аталған ұйыммен келісімшартты бұзу мәселесін қарастырып жатыр. Балалар үйлеріне жіберілді. Жақында олар бекітілген ережелерді қатаң сақтайтын балалар лагеріне қайта жіберіледі», делінген қалалық білім басқармасы таратқан хабарламада.
Халық наразылығына себеп болған оқиға Алматы прокуратурасының назарына да ілікті. Енді балалардың жазғы демалысын ұйымдастырумен айналысқан «БелРичи» ЖШС қызметі жан-жақты тексеріледі.

Осы тұста қылмыстық істерді тергеу Алматы қалалық сыбайлас жемқорлыққа қарсы қызметке жүктелді.

Істерді тергеп-тексеру аясында оқиғаның барлық мән-жайы анықталып, жергілікті атқарушы органның лауазымды тұлғалары мен лагерді ұйымдастырушылардың әрекетіне тиісті баға беріледі.