Қамбар ата түлігін өсіріп, кәсібінен нәсібін айырамын дегендердің арасында несие алып, ата кәсіпке ден қойғандар да бар. Жылқылардың жаппай сұлағанын көрген олардың «енді қайттік?» деп әбден мазасы қашты. Несие үшін шаруа қожалығы мен үйін кепілдікке қойған ауыл азаматының жүйкесі сыр бермегенде қайтсін?
«Таудағы фазендамды, үйімді кепілдікке қойдым. Қаражат аздау болған соң ауылдағы кішігірім баспанамды да тіркедім. Қысқасы, кәсібімді бастау үшін барымды бәске тіктім. Жүгіріп жүріп қолым жеткен қаржыға алған жылқылар еді. Табиғат тосын мінез танытты, жылқыларымды жасын жайпап кетті. Бес миллион теңге шығынға ұшырап отырмын», деген Тереңөзек ауылының тұрғыны Нұрболат Мырзақұловтың жүзінен өкініштің табы сезілді.
Жабыққан жұрттың қамыққан көңіліне қарлығаштың қанатымен су сепкендей болса да, пайдасын тигізер шенді табылар ма екен деп отырғанбыз?! Суыт хабарды естіген өңір басшысы Нұржан Нұржігітов жедел қимылдап, оқиға орын алған ауылға ат басын бұрды.
«Найзағай түсіп, жиырма алты жылқыны жайратқан жағдайды бәріміз естідік. Үкімет тарапынан өтемақы беру мәселесі ешқандай нормативтік актілерге сай келмейді екен. Жылқы алғандардың біразы несиеге кіріп кеткенін естідік. Оңай емес. Шығынға батқан шаруаларға «Қазпромлит» ЖШС көмектесетін болады», дейді Н.Нұржігітов.
Өңір басшысының сөзіне сенсек, шығынға батқан шаруаларға «Қазпромлит» ЖШС 10 миллион теңге қаражат бермек. Ал кімнің қанша шығынға батқанын ауылдың қоғамдық кеңесі зерделеп, қаражатты теңдей үлестірмек.
