Суреттің авторы Думан Құрманғалиев
Домбыраның құлағында ойнайтын қатардағы жауынгер әскер қатарына биыл көктемде шақырылып, жақында ғана 06708 әскери бөлімінің жас сарбаздарымен бірге Әскери ант қабылдады. Қарапайым отбасында дүниеге келген ол бала жасынан өнерге құштар. 3-сыныпта оқып жүргенде Павлодар қаласының дарынды балаларға арналған музыкалық мектеп-интернатында дәріс алып, күй өнеріне ден қояды. Бүгінде Отан алдындағы борышын өтеп жүрген жауынгер есімі елге танымал күйшілердің туындыларын шеберлікпен орындайды.
Павлодар облысынан талай өнер майталмандарының шыққанын жақсы білеміз. Мәселен, әрі ақын, әрі композитор Жаяу Мұса, әншілік, әртістік, домбыра тарту өнерлерін қатар алып жүрген Иса Байзақов осы өңірдің тумалары. Әншілік өнерімен Майра Уәлиқызы мен Меруерт Түсіпбаева халыққа танылса, бүгінгі күнде көпшілік қауым Павлодар облысының тумасы Иманбек Зайкеновтің Rosses SAINt IHN композициясымен әлемдік «Грэмми» (Gremmi) жүлдесін жеңіп алғанын жақсы біледі. Осы тұрғыда өнерпаз сарбаз Исламның да арманы көп екен. Ол Отан алдындағы борышын өтеген соң, Астана қаласындағы Ұлттық өнер университетіне оқуға түсуді жоспарлап жүр. «Әскери қызметте де домбыраны тастамай, өзіммен бірге алып жүрмін. Бұл – киелі аспап. Өнер таусылмас қазына деп білемін», дейді қатардағы жауынгер.
Өнерді өмірінің мәніне айналдырған Ислам Мұсаның әлі талай биіктерді бағындыратыны сөзсіз. Өнерпаз сарбаздың жолы әрқашан ашық болғай
