Кездесу кезінде өңірдегі өзекті мәселелер және әлеуметтік-экономикалық ахуал, сондай-ақ облыс бюджетінің орындалуы жөніндегі есеп талқыланды.
Депутат Сенаттың Экономикалық саясат, инновациялық даму және кәсіпкерлік комитеті өңір тұрғындарының өмір сүру сапасын арттыру мәселесі бойынша ынтымақтастық орнатуға дайын екенін жеткізді. Сонымен қатар сенатор Ақтөбе қаласының қысқы жылыту маусымына дайындық барысымен, Қандыағаш ауданындағы жаңа денешынықтыру-сауықтыру кешенінің және аудандық аурухананың жұмысымен танысты.
* * *
Парламент Мәжілісінің депутаты, «Ақжол» фракциясының жетекшісі Азат Перуашев қорғаныс және шаруашылық мақсатындағы өнімдер шығаратын «Зенит» кәсіпорнында болды.
Бес жүзге жуық адам жұмыс істейтін зауыт бүгінде Каспий теңізіндегі шекара қызметінде жүрген кемелерді құрастырады. Депутат кәсіпорын цехтарындағы жұмыстармен танысып, ұжым қызметкерлерінің сұрақтарына жауап берді. Зауыт қызметкерлері кәсіподаққа мүшелікке өту проблемасын қозғады. Еңбек қауіпсіздігін қамтамасыз ету, қызметкерлердің әлеуметтік-еңбек құқықтарын қорғау, жалақысын көтеру бойынша біраз мәселе көтерілді. Азат Перуашев бұл жайттарды мұқият зерттеп, заңнамалық тұрғыда қолдау көрсетуге дайын екенін жеткізді.
Сонымен қатар Мәжіліс депутаты Парламентте қабылданып және қаралып жатқан заңдарға, еңбек қауіпсіздігін қамтамасыз ету бағытындағы депутаттардың ұсыныстарын айтып, жан-жақты түсіндіріп берді.
* * *
Мәжіліс депутаты, «Amanat» партиясы фракциясының мүшесі Болатбек Нажметдинұлы Шымкент қаласының тұрғындарымен кездесті.
Депутат полиция департаментінің ұжымымен жүздесіп, жедел басқару орталығының жұмысымен танысты. Шымкентте қылмыс деңгейін және төтенше жағдайлар қаупін азайту бойынша арнайы іс-шаралар қолға алынған. Осы ретте шаһарда «Қауіпсіз қала» бағдарламасы сәтті жүзеге асырылып келеді. Сонымен қатар «Қауіпсіз мектеп» бағдарламасы аясында 186 мемлекеттік және жекеменшік мектептерде 3,3 мыңнан астам бейнебақылау камерасы орнатылды. Оның 2,5 мыңға жуығы аталған орталыққа қосылған. Тағы 260-қа жуығы жерасты өткелдерінде, денсаулық сақтау нысандарында, сауда орталықтарында, дүкендер мен базарларда қойылған. Бейнебақылау камераларының көмегімен биылғы жеті айда Шымкентте 300-ге жуық қылмыс ашылып, 33 мыңнан астам әкімшілік құқық бұзушылық анықталды.
Депутат заңнамалық деңгейдегі өзгерістерді ескере отырып, осы көлік түрлеріне бақылауды күшейту қажеттігіне назар аударды. Сондай-ақ бөлінген қаражатты тиімді пайдалану және жұмыс сапасын арттыру мәселесіне ерекше тоқталды.
* * *
Сыр өңіріне сапары барысында Парламент Мәжілісіндегі «Amanat» партиясы фракциясының мүшесі Мұрат Әбенов Шиелі ауданы тұрғындарымен кездесіп, сайлауалды бағдарламаның жүзеге асу барысымен танысты.
Депутатпен кездесуге жүзден астам азамат келді. Олар балаларды мектепке даярлауға берілетін қаржылай көмектің әділ бөлінбеуі, көпбалалы отбасынан шыққан және әлеуметтік аз қамтылған балаларды мектепте ыстық тамақпен қамтамасыз ету, медицина саласындағы әлеуметтік қызметкерлердің, психологтердің жалақысының төмендігі, білім беру форматының өзгеруі, міндетті әлеуметтік медициналық сақтандыру қорына аударып отырған қаржыны тиімді пайдалану жөнінде ұсыныс-пікірлерін ортаға салды. Мәселен, ауыл тұрғыны Айнагүл Заирова бала күтіміне орай екі немересіне мектепке даярлауға берілетін 40 мың теңгені ала алмай отырғанын атап өтті. Оның айтуынша, қызы үш баласымен қолында отыр, екеуі мектепте оқиды.
Азаматтардың пікірін назарға алған Мұрат Әбенов бұл мәселелер бойынша тиісті министрліктерге ұсыныс беретінін айтты.
* * *
Мәжіліс депутаттары, «Amanat» партиясы фракциясының мүшелері Еркін Әбіл мен Екатерина Смышляеваның Қостанай облысында жұмыс сапарымен барды. Депутаттар мектеп жасындағы балаларға арналған Смарт-орталықтың жұмысымен танысып, басқа да нысандарды аралады.
«Юбилейный» шағын ауданында салынып жатқан Смарт-орталық өңірдің жол картасына енгізілген. Нысан 600-ден астам оқушыға арналған. Мұнда роботтехника және бағдарламалау кабинеттерін, киберспорт залы, ландшафты дизайн студиясы және басқа да бағыттар бойынша зертханалар ашу жоспарланған. Сонымен қатар мәжілісмендер Tele2/Altel ұялы байланыс операторларының 5G жаңа буынының базалық байланыс стансасына барды. Облыстық ақпараттандыру басқармасының басшысы Азамат Қашиев депутаттарды жақында іске қосылған жаңа байланыс мұнарасымен таныстырды. Енді қалада Tele2 және Altel ұялы байланыс пайдаланушылары үшін 5G байланысы қолжетімді.
Бұдан кейін Қостанай облысындағы ауылдарды байланыспен қамтамасыз ету мәселелері бойынша кездесу өтті. Жиынға Мәжіліс және облыстық мәслихат депутаттары, ақпараттандыру басқармасының өкілдері, сондай-ақ ұялы байланыс операторлары қатысты.
