Фото: Ұлттық спорт қауымдастығы
И.Салжанов тұңғыш рет өткізілетін байқаудың мақсатын атап өтті: ұлттық спорт түрлерінің насихатын күшейту үшін осы саладағы журналистер, БАҚ өкілдері және авторларды кәсіби тұрғыдан бағалап, ең үздіктерін анықтау.
Байқау 1 қыркүйектен 2024 жылдың 1 наурыз аралығында 6 ай бойы өткізіліп, оған отандық журналистер, авторлар және шетелдік БАҚ өкілдері де қатыса алады.
Байқауда «Үздік бағдарлама» (телевизия, радио), «Үздік аналитикалық материал» (дәстүрлі баспасөз: газет, журнал), «Үздік танымдық материал» (интернет, БАҚ), «Үздік сұхбат» (YouTube арна), «Үздік фотосурет» (БАҚ, әлеуметтік желі), «Шетелдік БАҚ-та жарияланған үздік материал» (қазақтың ұлттық спорты туралы), «Әлеуметтік желідегі үздік материал» (блогинг, мобилография) сияқты номинациялар бар.
Байқаудың жеңімпаздары 2024 жылдың наурыз айында марапатталады.
Үш үздік авторға 1 000 000 теңге (1-орын), 700 000 теңге (2-орын), 500 000 теңге (3-орын) көлемінде ақшалай сыйлық беріледі.
Айта кетсек, байқау 2024 жылы Қазақстанда өткізілетін V Дүниежүзілік Көшпенділер ойындары қарсаңында өткізіледі.
