Фото: ашық дереккөз
Бүгінде 194 білім беру ұйымында күрделі жөндеу жұмыстары аяқталады. Мемлекет басшысы Қасым-Жомарт Тоқаевтың тапсырмасы бойынша жыл соңына дейін шағын қалаларда, аудан орталықтарында және ауылдарда орналасқан 1 000 мектеп алты бағыт бойынша жаңғыртудан өтеді: күрделі және ағымдағы жөндеу, пән кабинеттерін жабдықтау, мектеп жиһаздарын, кітапханаларды, асханаларды жаңарту, сондай-ақ балалардың қауіпсіздігін қамтамасыз ету. Оған қоса 1 000 пәндік кабинет ашу жоспарланып отыр, сондай-ақ қосымша 749 пәндік кабинет сатып алынады.
Білім беру инфрақұрылымын қолдау қорының арқасында 1 қыркүйекке дейін 25 мың орындық 13 мектеп, сондай-ақ жергілікті бюджет және жеке инвестиция есебінен 30 мың орындық 26 мектеп ашылады.
Айта кетсек, Қазақстанда «Жайлы мектеп» ұлттық жобасы бастау алды. Жоба шеңберінде 740 мың оқушыға арналған 369 мектеп салу көзделіп отыр.
Мемлекет жыл сайын мектептердің құрылысы мен жаңғырту жұмыстарына қаржы бөліп келетінін де айта кету керек. Мәселен, соңғы үш жыл ішінде 340 мың орындық 626 мектеп пайдалануға берілді.
