Қоғам • 07 Қыркүйек, 2023

Жезқазған жылу маусымына дайын емес – депутат

445 рет
көрсетілді
2 мин
оқу үшін

Сенат депутаты Серік Шайдаров Ұлытау облысындағы бірқатар мәселелерді атап, Премьер-министр Әлихан Смайыловтың атына сауал жолдады, деп хабарлайды Egemen.kz Сенаттың баспасөз қызметіне сілтеме жасап.

Жезқазған жылу маусымына дайын емес – депутат

Фото: https://senate.parlam.kz/

Депутат салынбаған су құрыбы, Жылу электр орталығының маусымға дайын болмауы, апаттық үйлер, тозығы жеткен инженерлік желі мен жол инфрақұрылымы, экология мәселесі, сапалы ауыз судың тапшылығы сынды мәселелерді көтерді.

Президент Қасым-Жомарт Тоқаев «Әділетті Қазақстанның экономикалық бағдары» атты Қазақстан халқына Жолдауында өмірлік маңызды инфрақұрылымдық жобаларды іске асыруға ерекше назар аударғанын айтқан депутат Ұлытау облысында қордаланған мәселе уақытында шешілуі тиіс екенін қадап айтты.

«Жезқазған қаласын сумен жабдықтайтын Есқұла су құбырының құрылысы 2021 жылы аяқталуы керек еді, бірақ 530 миллион қаражат игерілмегеннен нысан тапсырылмай қалды. Жобаны аяқтауға осы жылы 427 млн теңге бөлінген. Сіз Ұлытау облысында сапарда болған кезде осы жылдың маусым айында кестеге сәйкес нысанды тапсыру туралы тапсырма бердіңіз. Алайда бүгінгі күнге дейін нысан пайдалануға берілмеген, бейінді министрлік тарапынан бақылау болған жоқ. Жаңа Су ресурстары және ирригация министрлігі құрылғанын ескерсек, нысан биыл берілмей қала ма деп алаңдаймыз. ЖЭО-лардың алдағы жылыту маусымына дайындығы да көңіл көншітпей отыр. Өңірге барған кезде біз осы нысанды аралап, жөндеу жұмыстарының орындалу барысымен таныстық. Біз сіздің назарыңызды келесі мәселелерге, негізгі энергетикалық жабдықтың жоғары тозуына аударғымыз келеді. Станциядағы қазандық агрегаттарының орташа тозуы 74%-ды, турбиналардың тозуы 63%-ды құрайды, № 5, 6 және 7 турбоагрегаттар саябақ ресурсын бірнеше рет ұзартумен пайдаланылады. № 8, 10 қазандықтарды жаңғырту іс жүзінде жүргізілмейді. Негізгі жабдықта күрделі жөндеулердің артта қалуына байланысты алдағы жылыту маусымының басында негізгі жабдықтың барлық құрамының толық дайын болуы екіталай», деген сенатор Үкімет басшысынан жаңа құрылған облысқа қолдау қажет екенін жеткізді.