Мәдениет • 08 Қыркүйек, 2023

Бас сардар бейнебаяны

253 рет
көрсетілді
1 мин
оқу үшін

1916 жылғы Торғайдағы ұлт-азаттық көтерілісінің қаһарманы Амангелді Имановтың 150 жылдық мерейтойына орай белгілі күйші, Мәдениет қайраткері Айтбай Мұздахановтың «Амангелді дүбірі» атты күйіне бейнебаян түсірілді. Кеше осы бейнебаянның «Хабар» арнасының «Оян!» таңғы ойын-сауық бағдарламасында тұсаукесері өтті.

Бас сардар бейнебаяны

Күйші Айтбай ағамыз ха­лық батырына арнап жазған туын­дысын өткен ғасырдағы 60-жылдардың басында шы­ғарса керек. Сол кезде Аман­­гелді Има­новтың 90 жыл­­дығы аталып өтіпті.

Міне, содан бері де алпыс жыл уа­қыт өтті. Тың­дар­ман­ға жол тарт­қан бейнебаян­да «Аман­гелді дүбірін» да­рынды күйші, Қа­зақстанның еңбек сіңірген қай­раткері Анар Мұзда­ха­нова Астана қаласы әкім­дігі Е.Рахмадиев атындағы Мемле­кеттік академиялық фи­лар­­мо­ниясының Қазақ оркес­трі­мен бірге орындайды. Оркестр дирижері, Мәдениет қайрат­кері Нұрлан Бекенов.

– Айтбай ағаның көзі тірісінде осы шығармаға бейнебаян түсіруді көптен бері ой­лап жүрдім. Соның сәті батыр бабамыздың 150 жылдық мерейтойы қарсаңында іске асқанына қуаныштымын. Бей­небаян Қорғалжын ауданында түсірілді. Сондай-ақ біз «Бас сардар» атты деректі фильм жасадық. Сондағы кейбір сюжеттерді осыған пай­даландық. Бейнебаянның бір ерекшелігі, мұнда күй желісімен оқиға өрбіп, актерлер ойыны көрсетіледі. Бей­небаянда батырдың анасы Қалампыр Қақуқызы, Әбдіғапар Жан­босынұлы, Міржақып Дулат­ұлының бейнелері бар, – деді осы игі­ іс-шараны жүзеге асы­руға қолдау көрсеткен «Аман­гелді Иман» қорының басшысы, ба­тыр­дың ұрпағы Толқын Сұл­тан.