Дәстүрлі Жолдаудың биылғы басымдылығы экономикалық мәселелер екені кездейсоқ емес. Өйткені еліміздің материалдық негіздері пәрменді даму жолына түсе алмай келеді және оның әлеуметтік-экономикалық құрылымы әлі күнге дейін толықтай жаңғыра алған жоқ. Жылу стансаларындағы жарылыстар, тозығы жеткен техниканың жаңаланбауы, бюджеттің тиімсіз пайдалануы сияқты деректер Жолдауда заманауи кезеңнің ащы шындығы ретінде жарияланды. Бұл жердегі сыни талдаудың түпкі астары біздің қоғамды өркениетті елдердің қатарына қосу идеясы жатыр. Сонымен қатар Мемлекет басшысы бұрынғы жылдары үстірт қана аталып өтетін су проблемасына жаңаша көзқарасты қалыптастырып, су саясатын жүргізуді ұсынды. Болашақта елдер арасында су мәселесі мемлекетаралық қатынастардың маңызды қырына айналатындығы биылдың өзінде ерекше сезіле бастады.
Президент «Әділетті Қазақстан» мен «Адал азамат» сияқты ұғымдардың қоғамымызда басымдық танытуға тиіс екенін айта келіп, жастар арасындағы креативтілік, мобильділік, ашық сұхбатқа дайындық сияқты қасиеттердің кеңінен таралуына назар аударды. Қазіргі кезеңде әлде де шешімін таппай отырған проблемалардың қатарына кәсіби білімнің өндіріске пайдасын тигізе алмай келе жатқанын жатқызуға болады. Жоғары оқу орындары мен өндіріс орындары арасында өзара серіктестікке негізделген шынайы, адал және әділ қатынастар орнамаса, қоғамдағы, экономикадағы пәрменді дамуға, жаңғыру мен жаңаруларға қол жеткізе алмаймыз. Осы сипаттағы сапалық және сандық көрсеткіш оқу орнының маңыздылығы мен қаржыландыруын анықтауға тиіс. Түрлі деңгейдегі басшы мамандардың жеке жауапкершіліктерін арттырмай, айтқан сөзі сол айтылған жерде қалуы да мүмкін.
Мемлекет басшысы «Халық үніне құлақ асатын мемлекет» тұжырымдамасын нақты іске асыруымыз керек» дегенді бұрын да айтты. Бұл қағиданы Президенттің өзі ғана жүзеге асырмайды. Сондықтан аймақтық деңгейдегі осы тетіктің жұмыс істеу қабілеті мен нәтижелері үнемі бақыланып, есеп беріліп отырылуға тиіс. Демократияның айқын көрінісі айшықтала түсуі қазіргі кезеңде өте маңызды. Себебі, біз «Әділетті Қазақстан» мен «Адал азамат» ұғымдарын ерекше құндылықтар ретінде дәріптеу арқылы ғана өркениетті елдің қатарына қосыла аламыз.
Серік НҰРМҰРАТОВ,
Философия, саясаттану және дінтану институты философия орталығының директоры
