Жәдігер • 11 Қыркүйек, 2023

Музей қорындағы Абай жинағы

232 рет
көрсетілді
1 мин
оқу үшін

Қызылорда облыстық тарихи-өлкетану музейі қорында Абайдың төтеше басылған өлеңдер жинағы бар.

Музей қорындағы Абай жинағы

Сан ғасыр жәдігерлері қат­тал­ған қазына арасынан сирек кез­десетін кітаптар мен қолжазбалар кол­лекциясы тізімінде тұрған құн­ды дүние жақында ғана музей­дің ғы­лыми хатшысы Асхат Сайлаудың көзіне түсіп, ел алдына шығып отыр.

Кейін белгілі болғандай, кітап музей қорына 1982 жылы өткізіліпті. Адамзат ақыл-ойының биігінде тұр­ған Абайдың бұл жинағын музейге жергілікті ардагер мұғалім Мыңата Қалыбаев тапсырған екен. Жиырма үш жыл өткенде реставрациядан өтсе де туындыны індете іздеген еш­кім бола қоймаса керек. Ондағы шығар­маларды қолданыстағы қаріп­ке түсіріп отырған жергілікті өлке­танушы Жұмабай Байзақтың айтуынша, кітап он үш бөлімнен тұрады. Онда аудармаларымен қосқанда 102 өлең мен «Масғұт» поэмасы топ­тастырылған.

Әуелде баспа деректері сақтал­маған кітап 1916 жылы жарық көр­ді деген болжам жасалған екен. Му­зей­де өткен шағын басқосуға Алма­тыдан онлайн қосылған белгілі ғалым, филология ғылымдарының кандидаты, әл-Фараби атындағы Қазақ ұлттық уни­верситетінің оқытушысы Серікбай Қылышбай Абай шығармаларының кітап болып шығу тарихына тоқталып, осы жолдағы Алаш азаматтарының еңбек­тері туралы айтып өтті.

«1916 жылы Орынборда жарық көрген жинақта өлең аз. Ал мына кітап 1922 жылы Қазанда қазақтың жас ақыны Бернияз Күлеевтің жи­нақтауымен шыққан болуы мүм­кін»,  дейді ғалым.

Музейде өткен басқосуда зиялы қауым өкілдері құнды қазынаны жұртшылыққа кеңірек таныстыру бағытында ұсыныс-пікірлер айтты.

 

Қызылорда