Суретті түсірген – Ерлан ОМАР, «EQ»
Біршама уақыт бұрын Оқу-ағарту министрлігі Балалардың құқықтарын қорғау комитетінің басқарма басшысы Дана Мақтаева кейінгі бірер жыл бедерінде бастауыш сынып оқушыларын тегін тамақпен қамту үлесі 56,6 пайызды құрағанын, жаңа оқу жылынан бастап бұл көрсеткіш 100 пайызға жететінін мәлімдеп те үлгерген еді. Иә, Мемлекет басшысының тапсырмасына сәйкес 1 қыркүйектен бастап аз қамтылған отбасылардан шыққан 1,5 миллионнан астам оқушы, сонымен қатар әлеуметтік мәртебесіне қарамастан, бастауыш сынып оқушыларын толықтай тегін тамақпен қамту жұмысы қолға алынды. Деректерге сүйенсек, республика бойынша балалардың тамақтану құны орта есеппен 577 теңгені құрайды.
Президент тапсырмасын жүзеге асыру әр өңірде әрқалай жүргізіліп жатқаны белгілі. Өйткені біздің елде асханасы жоқ мектептер де бар ғой. Мұндай білім ошақтарында оқушыларды тегін аспен қамту мәселесі қалай жүзеге асырылмақ? Мәселен, Жамбыл облысында асханасы жоқ мектептердің саны отыздан асып жығылады. Облыстық білім басқармасының басшысы Мейірхан Өмірбектің айтуынша, жаңа оқу жылында 251 мыңнан астам оқушы өңірдегі 494 мектептің табалдырығын аттаған. Ал 1-сыныпқа қабылданған білім алушылардың саны 22 мыңнан асады. Қысқасы, Жамбыл облысында тегін тамақпен қамтылуға тиіс білім алушылардың саны он мыңдаған баланы құрайтыны анық.
Білім басқармасының басшысы келтірген дерекке сүйенсек, 1-4-сынып оқушыларын бір мезгіл ыстық тамақпен қамту мәселесін шешу үшін жергілікті қазынадан 2,5 млрд теңге қарастырылыпты. Сондай-ақ мектепке дейінгі ұйымдардағы әлеуметтік жағдайы мәз емес отбасылардан шыққан 11 326 баланы ыстық аспен қамтуға жергілікті бюджеттен 425,6 млн теңге бөлін-
ген.
Әрине, Президенттің тапсырмасын іске асыру үшін жергілікті қазынадан қомақты қаржы бөлінгені – құптарлық қадам. Алайда асханасы жоқ 36 мектепте бұл жұмысты үйлестіру үшін жауапты басқарма өкілдері қандай қадамға бармақ? Облыс орталығына жақын орналасқан Байзақ, Жамбыл, Тұрар Рысқұлов, Меркі, Талас аудандарынан бөлек шалғайдағы Сарысу, Мойынқұм, Шу аудандарында да асханасы жоқ мектептер аз емес. Бір сөзбен айтқанда, алыстағы аудандардағы жұмыстарды да кірпік қақпай қадағалау керек.
– Жаңа оқу жылынан бастап, оқушыларды бір мезгіл ыстық тамақпен қамту бойынша жұмыстар мықтап қолға алынған. Бүгінгі таңда асханасы жоқ мектептердегі мәселені реттеуге күш салдық. Атап айтқанда, Байзақ, Жамбыл, Меркі, Мойынқұм, Сарысу, Тұрар Рысқұлов аудандарындағы мектептердің оқу кабинеттеріне ыңғайластырылған асхана жасалады. Сонымен қатар Сарысу ауданындағы екі мектепке модульдік асханалар сатып алынып, орнату мәселесі күні бұрын қолға алынды. Одан бөлек, Меркі ауданындағы Алтын арық бастауыш мектебіне қажетті жабдықтармен қамтамасыз етілген модульдік асхана қою мәселесін де назардан тыс қалдырған жоқпыз. Ал 20 мектепке жақын орналасқан білім ордаларынан ыстық тамақ тасымалданып жеткізіледі, – дейді басқарма басшысы Мейірхан Өмірбек.
Сала басшысы келтірген дерекке зер салсақ, асханасы жоқ мектеп тек аудандарда ғана емес, Тараз қаласында да бар екен. Бұл мәселе, әрине, кімді болсын ойландырмай қоймайды. Білім басқармасының басшысы келтірген мәліметтерге сүйенсек, ешқандай мәселе туындамайтындай көрінетіні рас. Алайда бірер күн бұрын Ұлы дала шағын ауданының бір топ тұрғыны Президент тапсырмасы өңірде дұрыс орындалмай жатыр деп шу шығарды. Шаһардағы жаңа шағын аудан тұрғындары жаңа оқу жылының басты жаңалығының шарапатын көрмей отырғандарын жайып салды. Айтуларынша, жекеменшік мектептерде ыстық тамақпен қамту мәселесі шешілмеген.
Өткір мәселенің оңынан шешілуін талап еткен ата-аналар өңір басшысы Ербол Қарашөкеевтің алдынан бір-ақ шықты. Жаңа оқу жылындағы жаңашылдықтан құр қалған ата-аналар «Біздің балалар тоқалдан туған ба?», дейді шамданып. «Жекеменшік білім ордасында білім алып жатқан балалар Қазақстанның балалары емес пе? Осы мәселе миымызға қонбай тұр. Отанымыз бір болғаннан кейін барлық балаға бірдей жағдай қарастырылуы керек емес пе? Президент ешкімді бөле-жарып айтқан жоқ қой», дейді Ұлы дала шағын ауданының тұрғыны Нұрбибі Молдашева.
Ұлы дала тұрғындары мемлекеттік мектептің жоқтығынан балаларын жекеменшік мектепке беруге мәжбүр болып отыр. Әйтпесе ұл-қыздарын мемлекеттік мектепке қуана-қуана беруге әзір. Олар жаңа шағын ауданда осы мәселенің жедел шешілгенін қалайды.
Білім басқармасының өкілдері келтірген дерекке сенсек, балаларды ыстық тамақпен қамту мәселесі мемлекеттік мектептерде оңынан шешілген. Алайда жекеменшік мектептерде бұл мәселені шешу жолы қарастырылмаған. Халық көтерген өткір мәселе Оқу-ағарту министрлігінің тарапынан ғана шешімін табуы ықтимал.
Ұлы дала шағын ауданынан келген ата-аналардың шағымын тыңдаған өңір басшысы өткір мәселені назардан тыс қалдырмайтынын жеткізді. «Жауапты министрлікпен, министрмен сөйлесіп, сіздер көтерген проблеманы жеткіземін. Оған еш күмән болмасын», деді халықтың мұңын тыңдаған Е.Қарашөкеев.
Жауапты тұлғалар бар мәселе министрлікке тіреліп тұрғанын жайып салды. Айтуларынша, қолданыстағы заң барлық мектепке бірдей қаражат қарастыруға мүмкіндік бермейді. Ал Жамбылда жекеменшік мектептердің саны аз емес...
Жамбыл облысы
