Тұлға • 14 Қыркүйек, 2023

Журналист Жұматай мектебі

454 рет
көрсетілді
3 мин
оқу үшін

Былтыр ел Үкіметінің қаулысымен белгілі журналист, сатирик Жұматай Сабыржанұлының есімі туған жері – Қостанай облысы Амангелді ауданы Қабырға ауылындағы орта мектепке берілді. Осыған орай аталған білім ордасында қаламгер есімін ұлықтауға арналған мазмұнды іс-шара өтті.

Журналист Жұматай мектебі

Мінезді журналист Жұ­матай Сабыржанұлын көзі­қарақты оқырман жақсы біледі. Аман­гелді аудандық «Тың шұғы­ласы» газетінен басталған қа­лам­гердің еңбек жолы, алды­мен Торғай об­лыстық «Тор­ғай таңы», кейін Ақмола об­лыстық «Ар­қа ажары» газе­тінде жал­ғас­ты. Әсіресе оның есімі рес­публикалық «Ана тілі» га­зе­тінде істеген жылдары дүйім елге жақсы танылды. Сан түрлі өзекті мәселені қозғаған проблемалық мақалалары мен этнографиялық этюдтерін, ой­мақтай ғана болса да атан­дай ауыр жүк артқан ақпараттарын оқыр­мандар іздеп оқыды. Қо­ғамдағы келеңсіз көріністерді ащы мысқылмен түйреп, езуге күлкі үйірген сатиралық шы­ғармаларын да жұртшылық жылы қабылдады. Қарымды қа­ламгердің көзі тірісінде «Кәрі сайтан», «Өкпелесең, өзің біл» атты жинақтары жа­­рық көрген. Кейін жария­ланбаған дүниелері «Мен таныған шындық» деген атпен кітап болып шықты.

ап

Шалғай ауылға шырай бер­ген жиынның ашылуында Аман­гелді ауданының әкімі Тал­ғат Карбозов шыншыл қа­лам иесінің өмір жолы мен ең­бек­теріне тоқталып, іс-шара маңызын атап өтті.

– Бүгін Қабырға ауылы үшін тарихи сәт деуге болады. Өйткені бұған дейін бұл мектеп Н.Крупская есімімен атал­ған еді. Енді оған жерлес қа­ламгердің есімі беріліп отыр. Бұған қуаныштымыз. Осы білім ұясынан елімізге белгілі қан­шама азамат түлеп ұшты. Соның бірі – Жұматай Са­быржанұлы. Ақиқатты ар тұт­қан тұлғаның қазақ жур­налис­тикасында өз орны ғана бар емес, соның дамуына қос­­қан үлесі де мол. Біз соны мақ­тан тұтамыз. Қабырға ауылы – аудандағы шалғай елді­ме­кен­дердің бірі болса да, бола­шағы зор. Былтыр ауылға таза ауыз су тартылып, ұялы байланыс желісі орнатылды. Енді көтерме жолға күрделі жөндеу жүргізу мәселесін шешу көз­деліп отыр. Ауыл мектебі де на­зар­­дан тыс қалған емес. Жыл са­йын жөндеу жұмыстары жүр­­гізіледі. Сондықтан аяулы аға­­мыздың есімін иеленген мек­теп ұжымына зор табыс ті­леп, жиналған қауымға риза­шы­лығымды білдіремін, – деді аудан әкімі.

Мазмұнды іс-шараға Аста­на­дан келген қаламгердің зайыбы, журналист Әмина Мүр­жүсіпқызы, балалары – Саят, Гүлнұр, бұрын бірге қызмет іс­теген әріптестері – Сейфолла Ша­йынғазы, Жомарт Нұрман және Хамитбек Махмұтов, Ба­қытбек Бәйтеміров секілді аза­маттармен бірге бауырла­ры Жо­март, Нағашыбай және Әлім­жан Сабыржанұлы қаты­сып, шындықты ту еткен азамат туралы тағылымды ес­теліктер айт­ты. Жұматай аға­мыздың жары Әмина апайға сый-құрмет көрсетілді. Одан кейін жиын мек­теп оқу­шы­лары мен аудан өнер­паз­да­ры дайындаған концертке ұласып, спорттық іс-ша­ра­ларға жалғасты. Келген қо­­нақтар мектеп ауласына ағаш екті.

Іс-шара соңында Жұматай Сабыр­жанұлының рухына ар­­нап ас беріліп, дұға бағыш­тал­ды.