Спорт • 01 Қазан, 2023

Азиада–2023: Бүгін Қазақстанның төрт боксшысы рингке шығады

3137 рет
көрсетілді
1 мин
оқу үшін

Ханчжоуда өтіп жатқан Азия ойындарында Қазақстан құрамасынан төрт боксшы бүгін рингке шығады. Бұл туралы Sport. kz сайтынан мәлім болды, деп хабарлайды  Egemen.kz.

Азиада–2023: Бүгін Қазақстанның төрт боксшысы рингке шығады

Фото: kfb.kz

Күндізгі сессияда Қазақстанның екі спортшысы және кешкі сессияда екі спортшысы шаршы алаңға шығады.

Астана уақытымен сағат 13:15-те Наталья Богданова шаршы алаңға шығады. 66 келіге дейінгі салмақта жұдырықтасатын спортшымыз ширек финалда моңғолиялық Цэцэгдари Мягмарсурэнмен кездеседі.

Сағат 14:45-те жартылай финалдық жекпе-жек өткізетін 92 келіге дейінгі салмақтағы Сағындық Тоғамбай қытайлық Хань Сюэчжэньмен жұдырықтасады. Аталған жекпе-жектердің тікелей трансляциясын бокс жанкүйерлері Qazaqstan телеарнасынан тамашалай алады.

Сағат 17:15-те 57 келіге дейінгі салмақта Карина Ибрагимова моңғолиялық Намуун Монхормен ширек финалдық жекпе-жек өткізеді.

Сағат 19:00-де 63,5 келіге дейінгі салмақтағы ширек финалда Ертуған Зейнуллинов Моңғолияның тағы бір өкілі Чинзориг Баатарсухиинмен қолғап түйістіреді. Аталған жекпе-жектерді Qazsport телеарнасы тікелей эфирде көрсетеді.