Жаңашыл педагог

«Жас дарын» мамандан­ды­рыл­ған мектеп-лицейінде қа­зақ тілі мен әдебиеті пәні­нің мұғалімі болып еңбек ететін Сәндігүл Ермұратқызы тәрбие­ле­ген оқушылардың жеткен жетістіктеріне көз тояды. Ұстаз еңбегі оқушының оқудағы үлге­рі­мі­мен, білім саласындағы табыс­та­рымен өлшенетіні мәлім. Тек облыстық байқауларды былай қойғанда, кейінгі екі жылда оның шәкірттері арасынан Қ.Бітібаева атындағы республикалық олим­пиа­­даның облыстық кезе­ңінің жеңімпазы, екінші орын иегері, республикалық Әбіш оқу­ла­­­рының, республикалық пән олим­­пиадаларының жүлде­гер­лері шықты. Педагог онымен шек­­тел­мей, өңірдегі қазақ тілі мен әдебиеті пәні мұға­лім­де­рі­нің шығармашылық тобымен бірлесіп, «Олимпиадаға дайын­дық» жинағын құрастырып, оқу­шы­лардың оқу сауаттылығын арт­тырудың әдіс-тәсілдері туралы іс-тәжірибесімен бөлісті. Рес­пуб­ли­калық мерзімді басылым­дарда түрлі тақырыпта мақалалары жа­рия­ланды.

Ұстаздың айтуынша, бүгінде оқушылардың жан-жақты жеті­луіне, сапалы білім алуына барлық жағ­дай жасалған.

«Балалардың көкірегіндегі білім сәулесін жағу, оқуға деген қызы­ғушылығын арттырып, бо­йында сенімділік ұялату әр мұғалімнің миссиясы болса керек. Оқу­шының дарынын ашып, талпындыру үшін оған жеңістің дәмін сездіру маңызды. Өзіне сенімді бола түскен жасөспірім жақсы бағыт алып, сөзі де нықтала түсетінін байқаймыз. Осы уақытқа дейін түрлі республикалық байқау­лар мен олимпиадаларға 10-нан аса оқушым қатысып, жүлдесіз қайтқан емес. Білім додаларының қай-қайсысы болсын жас ұрпақты зерделі болуға, ұлттық салт-дәс­тү­рімізді тереңірек меңгеріп, білімді болуға жетелейді. Мысал үшін кітап оқу байқауы, Абай шығар­малары, салт-дәстүр, ұлт­тық құндылықтар бойынша жыл са­йын түрлі сайыстар өтеді. Оқу­шы­лардың кітап оқуға деген ынтасын арттыру үшін бүгінде мектебімізде әр сабақ алдында 5 минут кітап оқытамыз. Олардың зейінін кітаптағы білімге аудару ыждағаттылықты қажет етеді. Себебі бүгінгі балалар түрлі гаджеттерге, интернеттегі ойындарға құмартып тұратыны белгілі. Білім әлеміне қызықтыру үшін түрлі әдіс-тәсілдерді қол­да­намыз. Шын­дап келгенде, оқушылардың бо­йын­дағы енжарлық пен жал­қау­лықты, еріншектікті жеңуде бү­гін­де педагогтер қауымы үлкен шар­уалар атқарып отыр», дейді С.Аханбаева.

Шәкірттерінің алды бүгінде жо­ғары оқу орындарын тәмамдап, түрлі салада еңбек етіп жүр. Соның бірі – облыс орталығындағы мек­теп­тердің бірінде қазақ тілі мен әдебиетінен сабақ беретін Инга Гросс. Ұлты неміс бола тұра, мемлекеттік тілді жетік меңгерген педагог Абай, Мағжан оқуларында жүлденің алдын бермейді.

ПАВЛОДАР