Атап айтар болсақ, жуырда ғана Германияның Галле қаласында өткен АТР 500 санатындағы турнирдің жеңімпазы, әлемдік рейтингте 26-орында тұрған еліміздің ерлер құрамасының көшбасшысы Александр Бублик, «Үлкен дулыға» турнирлерінің үш дүркін жеңімпазы, Бейжің Олимпиадасының чемпионы, ATP санатындағы 19 турнирдің бас жүлдегері, Дэвис кубогінің иегері және әлемнің бұрынғы үшінші ракеткасы швейцариялық Стэн Вавринка, «Үлкен дулыға» және ATP санатындағы 17 турнирдің жеңімпазы аустриялық Доминик Тим, әлемнің 32-ракеткасы Себастьян Корда (АҚШ), рейтингте 40-орында тұрған Алексей Попырин (Аустралия) және тағы басқа теннисшілер елордадағы жарыстың көрігін қыздырды.
Сол спортшылардың ішінде дүниежүзілік рейтингте 34-орында тұрған франциялық Адриан Маннариноның бағы жанды. Сегіз күнге жалғасқан бәсекеде барлық қарсыласынан басым түскен Маннарино биылғы «Astana Open ATР 250» турнирінің жеңімпазы атанды. Бас жүлде үшін өткен бәсекеде Адриан әлемнің 28-ракеткасы америкалық Себастьян Корданы 4:6, 6:3, 6:2 есебімен тізе бүктірді. Франциялық теннисші «Astana Open ATР 250» турнирінің финалына екінші мәрте шығып, бірінші титулына қол жеткізді. Осыдан үш жыл бұрын, яғни 2020 жылы елордада алғаш рет ұйымдастырылған бәсекенің финалында ол аустралиялық Джон Милманға жол берген еді.
Адриан Маннариноның биылғы «Astana Open ATР 250» додасындағы жүріп өткен жолына үңілер болсақ, ол бастапқы бəсекелерде отандасы Артур Риндеркнех (7:6, 6:2) пен 21 жастағы ресейлік Алибек Качмазовты (6:2, 5:7, 6:3) жарыс жолынан ығыстырса, ширек финалда аустриялық Юрий Родионовтан басым түсті – 6:1, 7:6. Ал жартылай финалда тағы бір аустриялық теннисші Себастиан Офнерді жеңіп (6:4, 6:2), финалға жолдама алған-ды.
Сондай-ақ елордадағы жарыстың жұптық бәсекесінде америкалықтар – Натаниэль Леммонс пен Джексон Уитроу топ жарды. Мұхиттың арғы бетінен келген теннисшілер шешуші матчта хорватиялық Мате Павич пен аустриялық Джон Пирс жұбын аса тартысты өткен кездесуде 7:6 (7:4), 7:6 (9:7) есебімен жеңді. Натаниэль Леммонс пен Джексон Уитроу 2021 жылы Астанада өткен «ATP Challenger 125» сериясының турнирінде де жеңіске жеткен еді.
Өкінішке қарай, өз елімізде өткен турнирде отандастарымыз жергілікті жанкүйерлерді жарқын ойындарымен қуанта алмады. Александр Бублик екінші айналымда аустриялық Себастиан Офнерден 6:4, 6:2 есебімен жеңілсе, Михаил Кукушкин алғашқы айналымда-ақ сүрінді. Ол португалиялық Нуно Боргестің осал тұсын таба алмады – 7:5, 6:7. 4:6. Жұптық сында бақ сынаған Александр Недовесов Эквадор өкілі Гонсало Эскобармен бірге ширек финалға дейін жетсе, А.Бублик пен А.Голубев алғашқы айналымнан әріге аса алмады.
«Astana Open ATР 250» турнирінің статистикасына тоқталар болсақ, елордадағы «Beeline Arena» Ұлттық теннис орталығында өткен сегіз күндік бәсекені 16 мыңнан аса жанкүйер тамашалаған екен. Сондай-ақ турнир аясында теннисшілер дәстүрлі түрде Қазақстан теннис федерациясы ұйымдастыратын әлеуметтік маңызды іс-шараларға қатысты. Стэн Вавринка, Доминик Тим, Александр Бублик және Себастьян Корда «Асыл Мирас» аутизм орталығына барса, турнирдің финалистері Адриан Маннарино мен Себастьян Корда қалыптасқан дәстүр бойынша Ұлттық теннис орталығы жанындағы «Чемпиондар аллеясына» ағаш отырғызды.