Ән – халықтың қазынасы. Қазақтың дәстүрлі өнері кешегі мен бүгінді жалғаған алтын көпір секілді. Халқымыздың болмысын, жеріміздің кеңдігін, даланың дархандығын көргіңіз келсе – дәстүрлі ән тыңдап, күмбірлеген күйге құлақ түріңіз.
Аталған концертке дәстүрлі ән мектептерінің барлық өкілі қатысты. Арқа мен Жетісудың, Сыр мен Батыстың, Алтай мен Тарбағатайдың біресе кең құлашты, біресе сырлы, назды әндері мен домбыраның шанағында күмбірлеген күйлері салтанат құрды. Хакім Абай атамыздың «Сегізаяқ» әні көкке шарықтады.
Әсіресе Қазақстанның еңбек сіңірген қайраткерлері, белгілі дәстүрлі әншілер Айгүл Қосанова, Гүлмира Сарина, Гүлзира Бөкейхан, өнер майталмандары Секен Сыздықов, Нұрай Танабаев, Берік Омаров, Тельман Нүркенов, Данияр Мұқан, Әйгерім Нартүйе, Арафат Ысқақов, Бейбіт Мұсаев, халықаралық және республикалық байқаулардың жеңімпаздары Сәулежан Тағзия, Өзгеріс Шерікбай, Айнұр Қонысбаева, Жақсыкелді Маясаров, Жандос Иманбай, Зинат Қасымова, Нұржан Мейірхан, Рахат Бекасылов, Алуа Қалымбекова, Айдос Оңғарбай салған әндер мен орындаған күйлер тыңдарман құлағының құрышын қандырды. Сондай-ақ «Сарыарқа» халық музыкалық ансамблі мен «Шалқыма» халық би ансамблі де өнер көрсетіп, жұртшылық ықыласына бөленді.
