Фото: Polisia.kz
Алматы қаласының полиция департаменті ҰҚКД-мен бірге терроризм идеяларын насихаттаған күдіктіні ұстады. Ол Қазақстанда тыйым салынған «Хизб-ут-Тахрир әл-Ислами» діни-экстремистік ұйымының жақтаушысы болып шықты.
Сонымен қатар Түркістанда облыстық Полиция департаменті қызметкерлері прокуратураның үйлестіруімен терроризм идеяларын насихаттады деген күдікпен жергілікті тұрғынды ұстады. Ер адам Қазақстанда сот шешімімен тыйым салынған «ДАИШ» халықаралық террористік ұйымы идеологиясының жақтаушысы екен.
Күдіктілердің тұрғылықты жерін тінту кезінде діни әдебиеттер мен өзге де заттай дәлелдемелер тәркіленді. Қылмыстық кодекстің 256-бабының 1-бөлігі «Терроризмдi насихаттау немесе терроризм актiсiн жасауға жария түрде шақыру» бойынша сотқа дейінгі тергеп-тексеру жүргізіліп жатыр. Ұсталғандарға қамауға алу түріндегі бұлтартпау шарасы таңдалды.
