«Hero Training» бағдарламасының екінші кезеңі кәсіпкерлердің үлкен қызығушылығын тудырған. Қазақстан, Қырғызстан, Өзбекстан, Тәжікстан, Моңғолия, Әзербайжан және Түркия стартаптарынан барлығы 129 өтінім түсті. Стартаптар скринингтік, диагностикалық қатаң іріктеуден өткен. Жобаларды диагностикалау қортындысы екі аптаға созылған. «Fundamentals of Entrepreneurship» онлайн-акселерациясына қатысуға 80 стартап таңдалған. Ал Кремний алқабындағы «Draper University»-дегі «hero Training» офлайн акселерациясына қатысуға тек 12-сі іріктелді: «AlgoFarm», «Prosper Pay», «Loca, Pipedata AI», «EZ FACTOR», «Hired Valley», «TrustMe», «myMind», «Oku Toku», «WhoockAI», «Oraclus», «CheckAuto».
– «Hero Training» мүшелері «Draper University» кампусында алты айға дейін уақыт өткізеді, онда оларға баспана мен жұмыс кеңістігі беріледі. Бұл уақыт тәжірибелі технологиялық кәсіпкерлер мен «Draper University» экожүйесінің сарапшыларының басшылығымен жұмыс істей отырып, стартаптарға инвестиция тартуға және америкалық нарыққа шығуға бірегей мүмкіндік береді. Осы жылдың мамыр айында Калифорнияға барған 15 стартаптың бірінші легінің түлектері оқуды сәтті аяқтап, қазір өнімді дамыту, инвестицияларды тарту және өз жобаларын әлемдік деңгейде масштабтау бойынша белсенді жұмыс істеп жатыр, – деді «Astana Hub» бас директоры Мағжан Мәдиев.
Естеріңізге сала кетейік, Тим Дрэйпер «Digital Bridge – 2023» форумында сөйлеген сөзінде «Astana Hub»-та мені өз энергиясымен қуаттаған адамдармен кездестім. Бұл үлкен әлеуеті бар елге көзімді ашқан өте қызықты тәжірибе болды. Мұндағы адамдар білімді және ынталы. Шынында да, Қазақстан Орталық Азия үшін IT-хабқа айналуы мүмкін», деген еді.
«Draper University»-мен ынтымақтастық туралы шартқа Цифрлық даму, инновациялар және аэроғарыш өнеркәсібі министрі Бағдат Мусиннің АҚШ-қа ресми сапары кезінде қол қойылған еді. «Draper University» – Кремний алқабында беделді әрі бұрыннан қалыптасқан экожүйе. Ал «Astana Hub» – Орталық Азиядан онымен серіктестік бағдарламаны іске қосқан алғашқы технопарк.
