Суретті түсірген Әли ҒАЛЫМ
Amanat партиясының атқарушы хатшысы Дәулет Кәрібек келешекте де партия қазақ руханиятына қолдау көрсететінін айтты. Мәдениет және ақпарат вице-министрі Арман Жүдебаев екі күнге ұласқан ақындар айтысында тақым қысып қолдау көрсетіп, сөз сайыстырған дүлділдерді қолпаштаған көрермендерге алғысын жеткізді.
Қазақстанның халық ақыны Әсия Беркенова төрағалық еткен қазылар алқасы бас бәйгенің жүлдесі «Алтын домбыра» мен автокөлікті қарағандылық Мақсат Ахановқа байлады.
«Үндемесем өзіме өзім төре, сөйлеп кетсем өзіме сөзім төре», дейді қазақ халқы. Сол сөзге бүгін әділ бағасын берген қазылар алқасының ары таза деген ойдамын», деді Ә.Беркенова. 1-орын мен «Айтыс ақтаңгері» атағы қызылордалық Мейірбек Сұлтанханға, 2-орын павлодарлық Аспанбек Шұғатайға тиді. 3-орынды ұлытаулық Төлеген Жаманов пен Батыс Қазақстан облысынан келген Жансая Мусинаға бұйырды. Арнайы жүлде Жамбыл облысынан қатысқан Алина Айдаралы, Батыс Қазақстан облысының айтыскері Мұрадым Мейірланов және алматылық Шұғайып Сезімханға берілді. Өзге ақындарға да сый-сияпат табысталды.
