Көрмеге дәстүрлі музыкамен шебер үйлескен корей қолөнер туындылары ұсынылды. Бұл жұмыстардан корей халқына тән әсемдікті, нәзіктікті, шынайылықты көресіз. Әрбір туынды ұлттық нақышпен өрнектелген. Сонымен бірге көрмеге келушілер корей мен отандық әртістер дайындаған музыкалық қойылымды тамашалады. Мәселен, Кореядан келген өнерпаздар «пхансори» жанрындағы вокалдық қойылым көрсетіп, «санджо» музыкалық стиліндегі дәстүрлі «каягым» аспабында өнер көрсетті. Қазақтың дәстүрлі саз аспаптары жетіген мен қобыздың сүйемелдеуіндегі екі ел өнерпаздарының қойылымын да жұртшылық жылы қабылдады.
Мазмұнды шараның ашылуында «QazExpoCongress» ҰК» АҚ басқарма төрағасының орынбасары Сансызбай Жолдасбаев көрменің екі ел арасындағы мәдени алмасу жылы аясында өтіп отырғанын жеткізсе, еліміздегі Корея Республикасының Төтенше және өкілетті елшісі Чжо Тэ-ик «K-Maestro» тамыры тереңнен тартқан дәстүрлі музыка мен қолөнерді біріктіретінін атап өтті.
«Бүгінгі көрменің маңызы өте зор. Сондықтан осы көрмені өткізуге қолдау көрсеткен барлық азаматқа ризашылығымды айтамын. Сондай-ақ «K-Maestro»-да өнер көрсетуге Кореядан Қазақстанға арнайы келген өнер шеберлері Лим Чжэин, Чжи Арым, Чой Чжэёнге ерекше құрметімді білдіремін», деді елші.
