Бұл байқау аталған жоғары оқу орнында осымен үшінші мәрте өтіп отыр. Оған университеттегі барлық факультеттен 30-ға тарта студент қатысты. Солардың ішінен жүзге тарта туындыны жатқа оқитын Серік Қалданның бағы жанып, үздік деп танылды.
«Байқау өтеді дегеннен кейін бірден қатысуға бел будым. Шынымды айтсам, «Күлтегін» эпосын екі жарым апта ішінде жаттап алдым. Қиындығы да болды. Өйткені шығармада ежелгі түркі атаулары мен географиялық терминдер көп кездеседі. Сондай-ақ бұл эпостың басқа жырларға қарағанда ерекшеліктері де бар», деді ол.
Дарынды жас «Қобыланды батыр» мен Марабай ақынның дастандарын да жатқа біледі. Сонымен бірге ол 150 өлең, 11 қарасөзбен бірге, Абай атамыздан бастап, Ілияс Жансүгіров, Мұқағали Мақатаев, Мұхтар Шаханов өлеңдерін мүдірмей оқиды. Ол бір сөзінде қазір көркем шығармаларды жатқа оқитын жастардың көп емес екенін жеткізді.
«Осындай байқауларға қатысқан жігіттерді сирек көремін. Аға буын өкілдерімен салыстырғанда қазіргі жастар көркем туындыны жатқа айтуға онша қызықпайды. Одан гөрі біз қысқа бейнежазбаларды көріп, шағын мәтіндерді оқуға үйренгенбіз», дейді С.Қалдан.
Айта кетейік, байқауға белгілі түркітанушы ғалым Қаржаубай Сартқожаұлы, Мемлекеттік Елтаңба авторы, профессор Жандарбек Мәлібеков, опера әншісі, Мемлекеттік сыйлықтың лауреаты Кенжеғали Мыржықбай секілді елімізге танымал азаматтар қазылық жасады.
