Бейнежазбаны Қазақстан футбол федерациясы әлеуметтік желідегі парақшасына жариялады.
"Әжеміз дайын. Жігіттер дайын. Сіздер дайынсыздар ма?
Әже, жігіттер алаңда барын салады, уәде береміз!" - делінген видеоның түсініктемесінде.
Онда әлдебір ер адамның әжейден "Шелпекті неге пісіріп жатырсыз?" деп сұрағанын көруге болады.
"Футбол. Қазақтар ойнайды. Бүгін ойнайды. Сағат 1-де бастайды", - деп жауап береді күлімсіреген әже.
Желі қолданушылары көптеген жылы пікірлерін жазған.
"Евроға шықсақ, апамызды апару керек қой Германияға!", "Жаным, Әжетай! Ниетіңіз қабыл болып, өмір жасыңыз ұзақ болсын!", "Не деген мотвация! Алға басыңдар, жігіттер", "Ақ жаулықты анамыздың дұғасы қабыл болсын", "Қарттарымыздың тілегі қабыл болып, бұйырса 1:0 есебімен жеңсек болар еді" деген көпшілік.
Айта кетейік, 21 қарашада түнде футболдан Словения мен Қазақстан ұлттық құрамалары "Н" тобындағы екінші жолдама үшін маңызды матч өткізеді. Люблянадағы ойын Астана уақытымен түнгі 01:45-те басталады.
Матчты тікелей эфирде Qazaqstan және QazSport арналары көрсетеді.
