Қоғам • 24 Қараша, 2023

Терроризм туралы жалған хабар таратқандарға қандай жаза қолданылады?

180 рет
көрсетілді
2 мин
оқу үшін

Ішкі істер министрлігінде терроризм актісі туралы көрінеу жалған хабар бергені үшін қылмыскер қандай жауапкершілікке тартылатыны айтылды, деп хабарлайды Egemen.kz Polisia.kz-ке сілтеме жасап. 

Терроризм туралы жалған хабар таратқандарға қандай жаза қолданылады?

ІІМ экстремизмге қарсы іс-қимыл департаментінің аса маңызды істер жөніндегі аға жедел уәкілі Азамат Хасеновтың айтуынша, 2022 жылмен салыстырғанда биыл мұндай қылмыстардың шамамен 12 пайызға өскені байқалды. Мәселен, егер өткен жылдың 10 айының қорытындысы бойынша 141 қылмыстық іске тергеу жүргізілсе, биыл 160 қылмыстық іс тергеліп жатыр.

«Жыл басынан бері терроризм актісі туралы көрінеу жалған хабар бергені үшін 39 адам қылмыстық жауапкершілікке тартылды. Оның ішінде түрлі жаза тағайындалып, 12 адам сотталды: бас бостандығынан айыру жазасына – 3 адам, бас бостандығын шектеу жазасына 7 адам тартылды, бір адамға айыппұл салынса, бір адамға медициналық сипаттағы мәжбүрлеу шарасы белгіленді», деді спикер.

Айта кететін жайт мұндай хабарламалар Астана және Алматы сияқты ірі қалалардан жиі келіп түседі екен.

«Соңғы уақытта Қарағанды және Шығыс Қазақстан облыстарында «электрондық жалған терроризм» жағдайлары көбейді. Жарылғыш зат қойылды деген хабарламаларда көбінесе көлік құралдары, білім беру, денсаулық сақтау және сот мекемелері көрсетіледі», деп атап өтті Азамат Хасенов.

Сонымен қатар бұл қылмыс үшін қылмыстық жауапкершілік 14 жастан басталатынын еске салды.

«Терроризм актісі туралы көрінеу жалған хабар бергені үшін полиция биыл 14 кәмелетке толмаған баланы ұстады. Алматыда – 6, Қарағанды облысында – 4, Астана, Жамбыл, Маңғыстау мен Павлодар облыстарында бір адамнан. Сондай-ақ олардың барлығының ата-аналары бала тәрбиесіне қатысты тиісті шараларды қабылдамағаны үшін әкімшілік жауапкершілікке тартылды. Оларға үлкен сомада айыппұл салынды», деді аға жедел уәкіл.

Айта кетейік, терроризм актісі туралы көрінеу жалған хабарлама үшін Қылмыстық кодекстің 273-бабының санкциясы 5000 АЕК (бұл 17 млн теңгеден астам) мөлшерінде айыппұл салуды немесе бес жылға дейін бас бостандығынан айыруды я шектеуді көздейді. Сонымен қатар сот шешімі бойынша объектіге келтірілген залалды төлеуге тура келеді. Бұл сома 200 мыңнан 2 млн теңгеге дейін жетеді.