2023 жылы 21 желтоқсанда «Орал Ойл энд Газ» ЖШС Батыс Қазақстан облысында Рожков газ конденсатты кен орнын өнеркәсіптік пайдалануға берді. Компанияның 50% үлесі «ҚазМұнайГаз» ұлттық компаниясы акционерлік қоғамына тиесілі.
Өнеркәсіптік пайдалануға беру рәсіміне Қазақстан Республикасының Премьер-министрі Әлихан Смайылов, MOL Group компаниясының барлау және өндіру жөніндегі атқарушы вице-президенті Жомбор Мартон, Sinopec International Petroleum Exploration & Production Corporation компаниясының басқарма төрағасы Го Юэлян бейнебайланыс режімінде қатысты. Кен орнын Батыс Қазақстан облысының әкімі Нариман Төреғалиев, «ҚазМұнайГаз» ҰК» АҚ Басқарма төрағасы Мағзұм Мырзағалиев, MOL Group Ресей/ Қазақстан бас директоры Евгений Лапшин және First International Oil Corporation Limited (Sinopec компаниясының еншілес кәсіпорны) компаниясының вице-президенті Чжао Вэньминь іске қосты.
Кен орнында жылына шамамен 1 млрд текше метр газ, 500 мың тоннадан аса конденсат өндіру мүмкіндігі бар. Ал сұйытылған көмірсутекті газ өндірісінің деңгейі 150 мың тоннаға жетеді. Кен орнынан алынған шикі газ «Жайықмұнайгаз» ЖШС газ өңдеу кәсіпорнына беріледі. Өңделген тауар газы ішкі нарыққа жеткізіледі.
«Рожков» табиғи газ көлемінің қосымша көзіне айналады. Кен орнында өндірілетін шикізат «Жайықмұнайгаз» компаниясының кәспорнында өңделеді. Жоба шетелдік серіктестермен бірлесе жүзеге асырылады, бұл олардың тәжірибесін қажетті жобалық шешімдерді әзірлеу мен енгізу кезінде қолдануға мүмкіндік берді», деп атап өтті Ә.Смайылов.
«Былтыр қазан айында энергетика саласын дамыту жөніндегі кеңесте Мемлекет басшысы тауар газы өндірісінің көлемін арттыруды тапсырды. Біз биыл мамыр айында Оңтүстік Ақсай кен орнын, желтоқсан айының басында Шығыс Өріктау кен орнын іске қостық, ал жыл соңында Рожков кен орнын пайдалануға беріп отырмыз. Бұл жоба Батыс Қазақстан облысының әлеуметтік-экономикалық дамуына ықпал етеді. «Орал Ойл энд Газ» ЖШС жұмысы мен қызметтеріне кем дегенде 74% жергілікті мамандар тартылған. Жобаға құрылыс кезінде 450-ден аса адам жұмылдырылса, 80 тұрақты жұмыс орны ашылды», деп атап өтті М.Мырзағалиев.
«Sinopec компаниясының атынан Рожков газ кен орнында ресми түрде коммерциялық өндіру жұмысының басталуымен шын жүректен құттықтаймын. Қазақстан Үкіметіне жұмыс барысында тұрақты қолдау көрсетіп келгені үшін, сонымен бірге операциялық компанияның («Орал Ойл энд Газ») басшыларына атқарылған жұмыс үшін шынайы ризашылығымды білдіремін», деп атап өтті Го Юэлян.
«Біз Қазақстан мен Мажарстан үкіметінің MOL компаниясының қазақстандық мұнай-газ секторындағы қызметін екі ел арасындағы ынтымақтастықтың экономикалық жобалар арасындағы озық үлгісі ретінде мойындағанын жоғары бағалаймыз. MOL және «Орал Ойл энд Газ» командасына, сондай-ақ серіктестерімізге, екі елдің үкіметіне бірлескен жұмысы үшін алғыс білдіремін», деп атап өтті Жомбор Мартон.
«Орал Ойл энд Газ» ЖШС үлескерлері – «ҚазМұнайГаз» ҰК» АҚ (50%), Мажарстанның MOL Caspian Oil and Gas Plc. (27,5%) компаниясы және Қытайдың First International Oil корпорациясы (22,5%).
Газ конденсаты кен орны 2008 жылы кең ауқымды геологиялық барлау жұмыстарының нәтижесінде ашылды. 2040 жылға дейін мұнда 14,2 млрд текше метр шикі газ және 7,1 млн тонна конденсат өндіру жоспарланып отыр. Бүгінгі таңда шамамен 534 млн доллар инвестицияланды.
«Рожковское» кен орнын игеру арқылы Қазақстан Республикасының Ұлттық қоры 501 млрд теңгеге, жергілікті бюджет 110 млрд теңгеге толығады деп күтілуде. Бұдан басқа акционерлер өңірдің әлеуметтік-экономикалық дамуына кемінде 3,1 млрд теңге бөлуді, сондай-ақ жыл сайын келісімшарттағы міндеттемелер аясында қазақстандық кадрларды оқытуға инвестициялар сомасының 1%-ын арнауды жоспарлап отыр.
«Жаңа кәсіпорын өңірдегі газға деген тапшылықты жояды. Осыған дейін сұйытылған газды Ақтөбе облысынан тасымалдап келсек, енді өз өңірімізде газ сұранысы толық қамтылады», деді өңір әкімі Н.Төреғалиев.
М.Мырзағалиевтің айтуынша, жаңа өндіріс орны озық технологиялармен, жаңа техникамен жабдықталған. Жобаның өркендеуіне, қарқынды дамуына барлық мүмкіндік бар.
«ҚазМұнайГаз» Мемлекет басшысы Қасым-Жомарт Тоқаевтың мұнай мен газдың жаңа кен орындарын ашу жөніндегі тапсырмасын орындап, елімізді көгілдір отынмен қамтамасыз етуге үлес қосып келеді. Бұл жоба – жүздеген адамның, кәсіби мамандардың маңдай тер еңбегінің жемісі. «ҚазМұнайГаз» ұлттық компаниясы алдағы уақытта да өзіне жүктелген жауапкершілікті лайықты атқарып, ел игілігіне жұмсалатын жобаларды жалғастырады», дейді «ҚазМұнайГаз» ҰК» АҚ Басқарма төрағасы.
Батыс Қазақстан облысы
