Қоғам • 03 Қаңтар, 2024

Әуелбек жұртының қуанышы

103 рет
көрсетілді
2 мин
оқу үшін

Әуелбек ауылының жұрты жаңа жыл мейрамында қуанышқа кенелді. Мұндағы дәрігерлік амбулатория мен мәдениет үйі күрделі жөндеуден кейін қайта ашылды.

Әуелбек жұртының қуанышы

Ауыл адамдары бәрінен бұрын дәрігерлік амбулаторияның жаңар­­тылғанына мәз. Ескі ғи­ма­­ратты толықтай жөн­деуге, ме­ди­циналық құрал-жабдық­тармен жабдықтауға облыс бюд­жетінен 81 млн теңге бө­лі­ніпті. Мердігер «Винтрейд» компаниясы барлық жұмыстарды уақтылы аяқтап, жыл соңында халық игілігіне тапсырды.

Аудандық аурухананың бас дәрігерінің міндетін атқарушы Бақытгүл Қабжапарованың айтуынша, биыл аталған өңір бойынша Жалаулы, Мүткенов, Әуелбек ауылдарындағы дәрігерлік амбулаториялар жаңартылған. Әрі емдеу мекемелеріне жаңадан жедел жәрдем көліктері де сатып алыныпты.

– Ескі ғимарат болғандықтан, Әуелбектегі амбулаторияны то­лықтай жөндеуге тура келді. Тек қабырғалары ғана қалып, өзге бөліктері толықтай ауысты­рыл­ды. Жаңадан жиһаздар, медициналық құралдар жеткізілді. Бұдан былай ауыл адамдары ауыра қалса емдеу іс-шараларынан соң фи­зиокабинетіне келіп, оңал­ту про­цедурасынан өте ала­ды. Жаңа кабинетте барлық жағдай қарас­тырылған, – дейді ақ же­леңді.

ыпрп

Негізі Әуелбектегі емдеу мекемесі Өтес, Қараоба, Жаң­ауыл, Исантерек ауыл­да­рын­дағы медициналық пункт­терді біріктіреді. Яғни аталған елді мекендердің халқы мұнда келіп емделе алады деген сөз. Медициналық ұйымда еңбек өтілі 30 жылдан асатын дәрігер Баян Темірболатқызы мен екі медициналық қызметкер тұрақты қызмет көрсетеді. Соңғы екеуі биыл көші-қон бағдарламасы аясында оңтүстіктен қоныс ауда­рып келіпті. Аумақ бойын­ша 1400 тұрғын дәрігерлік амбула­торияның көмегіне жүгіне алады.

Бұл күні ауылда жөндеуден өткен мәдениет үйі де тұсауын кесті. Оның жөндеуіне қазынадан 156 млн теңге жұмсалған. Ғима­­раттың есік-терезесі, бас­пал­дақ­тары, жылу жүйесі толықтай жа­ңарды. Нысанның бірінші қа­батында волейбол, баскетбол, шағын футбол ойнайтын спорт зал­дары қарастырылған. Ал екінші қабатында 80 орындық концерт залы, кітапхана, ардагерлер клубы, клуб қызметкерлері мен домбыра кабинеті, сондай-ақ домбыра коворкинг орталығы орналасқан.

 

Павлодар облысы,

Ақтоғай ауданы,

Әуелбек ауылы