Алюминий өндірісі технологиясында алдын ала күйдірілген анодтың мәні айрықша. Анод өндірісіндегі ең ауқымды жабдық – анодты күйдіру пеші. 50 камерадан тұратын жабдықтың ұзындығы – 200, ал ені 30 метрден асады. Пеш жобасын немістің «Riedhammer» компаниясының мамандары әзірлеп, өздері орнатып берген. Кейін оны шетелдік мамандардың бақылауымен отандық «Строймонтаж» компаниясының өкілдері іске қосыпты.
Зауыт мамандарының сөзінше, күрделі жөндеу жұмыстарына даярлық – өте жауапты әрі ұзақ уақытты талап ететін маңызды үдеріс. Ауқымды жұмыстың тиянақты кестесі жасалып, жөндеу жұмыстары басталмас бұрын қажетті жабдықтар, қосалқы бөлшектер мен материалдар түгел жеткізілген. Анод күйдіру пеші тамыз айында толық тоқтатылған еді. Ал жөндеу жұмыстары жоспарлы уақыттан 2 апта бұрын аяқталды.
Пешті жаңғырту барысында әлемдік анод өндірісі өнеркәсібіндегі ең озық жетістіктер ескерілді. Жалынға төзімді 14 мың тонна қаптама аршылып, орнына Нидерланд, Үндістан мен Германияда шығарылған заманауи жоғары сапалы материалдар қайта орнатылды. Одан бөлек, шығарынды газдарға арналған 4 коллектор алмастырылған. Соңғы буындағы жаңа жабдықтардың сенімділігі жоғары әрі олар пеш жұмысын айтарлықтай жақсарта алады. Күрделі жөндеуден соң анод күйдіру көлемі жылына 138,4 мың тоннаға жетеді деп жоспарланған. Жаңғыртудың екінші кезеңі – жалын-жағу жабдықтарын алмастырған соң бұл көрсеткіш – 153 мың тоннаға жетеді деген үміт бар.
– Бұл инвестициялық жоба тек кәсіпорынның өндіріс көлемін ұлғайтып қана қоймай, өнеркәсіптің энергия тиімділігін арттыру, қоршаған ортаға экологиялық жүктемені төмендету сынды бірқатар кешенді міндеттерді шешуге бағытталған. Пешпен қатар біз газ тазарту жүйелерін де күрделі жөндеуден өткіздік. Алдағы 10 жылда олардың жұмыс тиімділігі – 99,5 пайыз болады, – деді ERG-дің Қазақстандағы бас директоры Серік Шахажанов.
Қазақстан электролиз зауыты жаңа 16 электролизерді іске қосып, өндіріс қуатын ұлғайтуды көздеп отыр. Нәтижесінде, бастапқы алюминий тотығы өндірісінің көлемін жылына 14 мың тоннаға арттыруға мүмкіндік туады. Күйдіру пештерін күрделі жөндеу жұмыстары алдағы уақытта кәсіпорынды өз анодтарымен қамтамасыз етуге сеп.
Павлодар облысы
