Коллажды жасаған – Қонысбай ШЕЖІМБАЙ, «EQ»
«Egemen Qazaqstan» газетінің 2023 жылғы 26 желтоқсандағы №247 санында «Тіршілік нәрінен тарығып отыр» тақырыбымен мақала жарияланған еді. Жазбамызда шалғайдағы Мойынқұм ауданының бірнеше ауылы тұщы суға зар болып отырғанын нақты дәлелдермен келтірген едік. Тұрғындардың дабыл қағуынан кейін жарияланған мақалаға аудан әкімдігі жауап жолдапты. Хат мәтініне зер салсақ, өзекті мәселені шешу жолында біршама жұмыс атқарылып жатқан көрінеді.
«Өткен жылдың соңына қарай «Egemen Qazaqstan» газетінде «Тіршілік нәрінен тарығып отыр» тақырыбындағы мақалаға орай толыққанды жауап бергенді жөн көрдік. 2014 жылы Шығанақ ауылының су құбыры мембраналық тазарту құрылысымен салынған. Кейінгі жылдары мембраналық қондырғы істен шығуына және Балқаш көлінің деңгейінің төмендеуіне байланысты таза ауыз сумен толық қамтамасыз етуде мәселелер туындады. Мұндай өзекті мәселе Мыңарал ауылы, Мыңарал стансасы және Бурылбайтал, Мирный, Қияқты елді мекендерінде де кездесті. Осы жағдайды қалпына келтіру мақсатында облыс әкімдігінің тұрғын-үй коммуналдық шаруашылық және энергетика басқармасының жанынан құрылған жұмысшы топпен зерделеу жұмыстары жүргізілді. Топ құрамына мембраналық қондырғы орнатуда тәжірибесі бар «Абырой Групп» ЖШС, «ГидроПрибор» АҚ және «ДЕК» ЖК енген. Зерделеу қорытындысы негізінде тиісті заң талаптары сақтала отырып, осы елді мекендерді толық ауыз сумен қамтамасыз ету үшін 2023 жылдың екінші жарты жылдығында облыстық бюджеттен 311,9 млн теңге қаржы бөлінді. Бүгінде «Абырой Групп» ЖШС-мен 155,95 млн теңгеге және «ДЕК» ЖК-мен 155,95 млн теңгеге келісімшарт жасалды. Келісімшарт негізіндегі 30 пайыздық алдын ала төлемдері екі мердігерге де жасалып, тиісті жұмыстар басталды. Аталған елді мекендердегі ауа райының қолайсыздығынан таза ауыз су беру мерзімі наурыз-сәуір айларына жоспарланып отыр. Қазіргі таңда жоғарыда айтқан елді мекендерге тұрмыстық қажеттілікке пайдалануға көлдің тұщы суы беріліп отыр. Ал ауыз су теміржол арқылы және су тасушы автокөлікпен тасымалданып жатыр», делінген әкімдік өкілі жолдаған жауапта.
Аудандық әкімдік жолдаған ресми жауапта Қылышбай ауылындағы жағдай да бақылауға алынғаны айтылыпты. Мұндағы мәселе де оңынан шешімін табатынына кепілдік берілген. Жоғарыда жазылған ауылдардың мәселесіне қарағанда қылышбайлықтардың жанайқайының жедел шешімін табатынына расында күмән жоқ. Өйткені істен шыққан қондырғыны қалпына келтіру аса бір қиындық тудыра қоймасы анық.
Мойынқұмдағы Мыңарал ауылы, Мыңарал стансасы және Бурылбайтал, Мирный, Қияқты елді мекендерінде қоныстанған халықтың мәселесі жедел шешілсе, құба-құп. Әкімдіктің ресми жауабында ауыз су беру мерзімі бұл ауылдарда наурыз-сәуір айына жоспарланып отырғаны айтылыпты. Ол күн де алыс емес.
Шыны керек, ауыз су проблемасы кездесетін кейбір аудандардағы ауылдардың бірқатарында жоспарлы жұмыс ілгеріде-ақ жүргізілген. Алайда атқарылған жұмыстың сапасы көңіл көншітпейді деуге негіз де жоқ емес. Оған мысал да жеткілікті. Біраз ауылдағы мердігерлердің сапасыз атқарған жұмысы туралы мақалалар бас басылымда бірнеше рет жарияланды. Алдағы уақытта ауыз су құрылысы жүргізілетін ауылдардың жұмысына әкімдер сергек қараса дейміз. Қазынаның қаржысын сапасыз атқарылған жұмысқа қайта жұмсағанша басқа да әлеуметтік мәселелерді оңынан шешкен жөн емес пе?
Жамбыл облысы
