Суретті түсірген – Ерлан ОМАР, «EQ»
Осы ретте өткен жылы Үкімет отырысында бас қосқан сала мамандары алдағы бесжылдықта 14 гигаватт электр қуатын енгізуді тағы бір пысықтады.
Мемлекет басшысы да еліміздің энергетика саласын одан әрі дамытудың аса маңыздылығын, трансұлттық мұнай-газ корпорациясына инвестицияны тарту қажеттілігі жөнінде баса айтқан болатын. Аталып отырған 14 гигаватт жаңа электр қуаты іске қосылса, жаңартылатын энергия көздері жобасының арасында су электр стансасы да қалыс қалмасы анық.
Былтыр республика бойынша энергия көздерін салу мен жаңғыртуға 146,5 млрд теңге бөлінген. Оның 19 млрд теңгесі 8 энергоблок, 43 қазандық және 40 турбинаны жөндеу секілді жеке инвестицияға жіберілген. Өткен жылы Астана қаласындағы №3 ЖЭО, «Юго-Восток» пен «Тұран» секілді екі жылу газ стансасы іске қосылды.
Көкшетаудағы қазандықтарды, Екібастұз бен Риддер қаласындағы жылу электр стансаларын күрделі жөндеуге және Маңғыстаудағы атом электр комбинатына жабдықтарды сатып алуға мемлекеттік резервтен 21 млрд теңгеден аса қаржы бөлінген. Қазіргі таңда Екібастұз қаласындағы №1 жылу электр стансасындағы қуаты 500 МВт болатын №1 энергоблокты қалпына келтіру және жаңғырту бойынша ауқымды жоба іске асырылып, биылғы жылдың маусым айында толық пайдалануға берілмекші. Сонымен қатар №2 жылу электр стансасындағы қуаты 636 МВт болатын №3 энергоблок құрылысының жұмысы басталды. Орал қаласындағы жылу электр стансаларын тарату құрылғылары жаңартылып, Түркістан мен Леңгір қалаларындағы қосалқы стансасының құрылысы аяқталған. Бүгінде Көкшетау (240 МВт), Семей (360 МВт) және Өскемен қалаларында жылу электр стансасын салу мәселесі қарастырылып, электр энергиясын өндіру 112,9 млрд кВт/сағ құрайды деп күтіліп отыр.
Елімізде жыл сайынғы инвестиция лимиті 32 млрд теңгеден 428 млрд теңге аралығын құраса, бұл сома энергия өндіруші ұйымдардың негізгі жабдықтарын жаңғыртуға, қайта жаңғыртуға әрі кеңейтуге мүмкіндік берді. Батыс аймақтағы электр желісін нығайтуда стратегиялық маңызды жоба іске қосылып, соның аясында жалпы ұзындығы 780 шақырымға жуық бес 220 кВ электр беру желісі салынған.
Сонымен 2027 жылға дейін жалпы қуаты 6,7 ГВт болатын жаңартылған энергия көздері нысандарын салудың 5 жылдық аукциондық кестесі бекітілді. Бүгінде жалпы қуаты 495,6 МВт болатын жаңартылған энергия көздерінің 16 нысаны іске қосылып, инвестиция көлемі шамамен 450 млн долларды құрап отыр. Жаңартылатын энергия көздері саласында жаңа ауқымды жобаларды жүзеге асыру бойынша шетелдік инвесторлармен бірқатар келісімге қол қойылды. БАӘ, Total Energies және China Power International Holding-пен бірлесе жалпы қуаты 3 ГВт болатын үш жел электр стансасын салу жоспарланып отыр.
