Коллажды жасаған – Қонысбай ШЕЖІМБАЙ, «EQ»
Осылайша, өткен жылы іске кіріскен әлеуметтік инспекторлар барлығы 1 127 тексеру жүргізді. Мұның 551-і – профилактикалық бақылау шеңберінде, 476-сы жоспардан тыс тексерулер болды.
Мәселен, Еңбек және әлеуметтік қорғау комитетінің Түркістан облысы бойынша департаменті Шымкент қаласы тұрғыны, бірінші топ мүгедектігі бар азаматтың өтініші негізінде Түркістан облысы бойынша санитариялық-эпидемиологиялық бақылау департаментіне, «Ұлттық сараптама және сертификаттау орталығы» ШЖҚ РМК және «Біркөлік» оңалту сауықтыру кешені» ЖШС-на жоспардан тыс тексерулер жүргізді. Тексеру нәтижелері бойынша лауазымды адамдарға анықталған бұзушылықтарды жою туралы нұсқама берілді, сондай-ақ әкімшілік жауапкершілік шаралары қабылданды.
Еңбек және әлеуметтік қорғау комитетінің Солтүстік Қазақстан облысы бойынша департаменті Шал ақын ауданының білім бөліміне және Новопокровка ауылдық округі әкімінің аппаратына осы объектілердің қолжетімділігі мәселесі бойынша жоспардан тыс тексеру жүргізді. Мұнда да әкімшілік жауапкершілік шаралары қабылданды.
Сондай-ақ өңірлердегі әлеуметтік инспекторлар мүгедектігі бар адамдардың заңды құқықтарын қамтамасыз ету үшін әлеуметтік инфрақұрылым объектілерінің бейімделу іс-шараларын жүргізуде оң өзгеріс бар екенін атап өтті.
«Ақмола облысында объектілердің қолжетімділігі мен жарамдылығына тұрақты негізде мониторинг жүргізіледі. Жалпы, Көкшетау қаласы бойынша мүгедектігі бар адамдар үшін ортаның қолжетімділігі жақсарып келеді. Нысан иелері халықтың осы санаты алдындағы әлеуметтік жауапкершілікті түсінеді. Мәселен, Әуелбеков көшесі, 94 мекенжайындағы №1 қалалық емханаға барған кезде кіреберіс есіктердің ауыстырылғанын, санитарлық-тұрмыстық бөлменің бейімделгенін байқауға болады. Мемлекеттік қызметтердің барлық түрін алуға болатын Көкшетау қаласының ХҚО-лары да реттелді. «Көкшетау» және «Достар» мәдениет үйлеріндегі қолжетімділік көңілге қуаныш ұялатады», деді Ақмола облысының тұрғыны, бірінші топтағы мүгедек Рамазан Мұқатаев.
Сонымен қатар Көкшетау қаласының тұрғыны, бірінші топтағы мүгедектігі бар Лилия Харламованың айтуынша, көптеген нысанда қолайлы жағдай жасалып жатыр. Мысалы, қаладағы мемлекеттік мекемелерде пандустар, нашар көретіндерге тактильді құралдар орнатылыпты. Бұған қоса «Кристалл», «Союз», «Рио», «Рубин», «Орталық базар» сауда үйлерінде кедергісіз орта қалыптасқан екен.
Жалпы, Еңбек және әлеуметтік қорғау комитетінің аумақтық департаменттері 2023 жылы 1 783 тексеру жүргізіп, анықталған бұзушылықтарды жою туралы 1 171 ұйғарым берді, 98,4 млн теңгеден аса сомаға 467 айыппұл салынды.
