Облыстық денсаулық сақтау басқармасының басшысы Қайсар Абдалиевтің айтуынша, заманауи құрылғыны сатып алуға «Қазақстан халқына» қоры демеушілік көрсетті. Осылайша, аурухананың нейрохирургия бөлімшесі жаңа медициналық құралдармен толықты. Оның ішінде операцияға арналған үстел, нейронавигация құрылғысы мен нейромонитор, операция кезінде қолданылатын қосалқы бөлшектері бар.
Балалар ауруханасы директорының емдеу ісі жөніндегі орынбасары Ербол Есболаевтың айтуынша, аталған құрылғылардың, оның ішінде операция үстелінің маңызы зор. Өйткені енді күрделі операцияларды жергілікті жерде жасауға болады.
«Біз бас сүйегінде, ми мен жұлында туабітті немесе кейін пайда болатын ісік, өзге де жарақаттарды толық емдеуге мүмкіндік алып отырмыз. Нейромонитордың операция кезінде белгілі бір патологияның ену жолын дәл табуға септігі мол. Бұл – мидағы патологияларды тез анықтауға мүмкіндік беретін инновациялық құрылғы», дейді Е.Есболаев.
Оның айтуына қарағанда, аурухана дәрігерлері жаңа құрылғымен алғашқы операцияны сәтті жасады. Операция үстеліне желкесінде ісігі бар екі жасар бала жатқызылған. Жаңа құрылғының көмегімен балақайдың желкесіндегі ісік алынып тасталды.
Атырау облысы
