Қарапайым отбасынан шыққан талантты жасөспірім кішкентайынан цифрлық технологияларға қызығып өскен. Ол қазір Python-да кодит және ойын серверлерін жасайды. Осы арқылы ел бойынша орташа жалақыдан жоғары табыс тауып отыр. Ұлттық статистика бюросының дерегіне сүйенсек, 2023 жылдың IV тоқсанында Қазақстандағы номиналды орташа жалақы 393 605 теңгені құрған. Бұл – IT саланың үлкен мүмкіндіктерге жол ашатынының, жақсы табыс көзі екенінің дәлелі.
– 10 жасымда әлеуметтік желілер туралы бір фильм көріп қалдым. Сол жердегі Марк Цукербергтің оқиғасы мені таңғалдырды. Ол интернеттегі адамдар арасындағы қарым-қатынастың жаңа дәуіріне айналдыруды жалғыз бастағанын түсіндім. Бұл әлем мені өзіне лезде тартып алды. Осыдан кейін бағдарламалауды, атап айтқанда, веб-әзірлемелерді зерттеуге көштім, – дейді Әмір.
Оның алғашқы қадамы «YouTube-те» «HTML» және «CSS» сабақтарын көруден басталған. Содан кейін Оралдағы «IQ Hub» роботтехника және бағдарламалау мектебіне бара бастаған. Онда «Python» негіздерін үйреніп, сандық салаға аяқ басқан. Солай бұл бағытты барынша зерттеп, мүмкіндігінше білімін жетілдіре түскен. Ең қызығы, мұның бәрі 30 мың теңгелік курстан басталған. Әмірдің айтуынша, үлкен ағасы қолдамаса, мұның бәрі болмас еді. Ол анасын бағдарламалау курстарын сатып алып беруге көндірген. Бастапқыда үлкендер не үшін қажет екенін түсінбей, қарсы болған. Алайда ағасы оларға курстың дамуға маңызды екенін және болашақта жоғары жалақы алатын маман болуға мүмкіндік беретінін айтқан. Солай ата-анасы цифрлық әлемді меңгеруі үшін Әмірдің барлық жағдайын жасай бастаған. Бұл – басқа да ата-аналарға үлгі болатын іс.
– Осылайша, алғашқы жобаларды әзірлеумен айналыса бастадым. Яғни әртүрлі ойындарға арналған серверлер (мысалы, CS: GO және Minecraft) және әлеуметтік желі чат-боттары. Көп ұзамай «Аpexnodes» хостингін іске қостық. Басында капитал жинақтардан алынды. Үш адамнан тұратын команда жинап, одан кейін ТМД елдеріндегі ойын серверлерін сату және техникалық қолдаумен айналыстым. Ресейден алғашқы тапсырыс алған кезде қалай қуанғаным есімде. Ол бізге шамамен 45 мың теңге әкелді. Кейінірек «Jaiq Hub» аймақтық технопаркінің қолдауымен жобаны кеңейттік, – деп тәжірибесімен бөлісті ол.
Ісі оңға басса да, ізденуді тоқтатпаған. Технопаркте оқып, стартаптарды іске қосу туралы білімін тереңдете түскен. Қашықтыққа бюджетті қалай дұрыс бөлу керектігін біліп, қарым-қатынас дағдыларын жетілдірген.
– Көп ұзамай еңбегімді сатып, ай сайын тұрақты табыс әкелетін жұмыс табуға кірістім. Ол кезде жасым 13-те еді. Содан «Millida» компаниясынан ұсыныс келді. Олар ойын ішіндегі элементтердің техникалық әкімшісі мен жасаушысы жұмысын ұсынды. Мені «Discord» арқылы өткен сұхбатқа шақырды. Солай істеген басқа жобаларым туралы айттым. Олар жобаларымды көріп, тәжірибе алмасуға, үйретуге дайын болды. Әңгімелесуде жас туралы әңгіме болған жоқ. Шамасы, жақсы студиялық микрофонның арқасында менеджерлер мені 16-да деп ойлады. Тек бір айдан кейін, жалақы төлеу үшін өзімнің деректерімді жіберген кезде, компания менің нақты жасымды білді. Бірақ ешқандай теріс реакция болған жоқ. Керісінше, жалақыны 20 пайызға өсірді, – деді жас талап.
Компания менеджменті оқушының университетті бітірген басқа мамандардан еш кем түспейтініне қатты таң қалған. Бастапқыда Әмірге жұмысты мектептегі оқумен үйлестіру қиын болды. Мұғалімдер тарапынан көп ескертулер жасалып, мәселелер шыға бастады. Кейде үй тапсырмасын орындауға мұршасы болмады. Сол себепті де қазір штаттан тыс жұмыс істеп жүр. Компанияда жақсы тәжірибе жинап, 13 мың код жолын жазған. Алайда онымен тоқтап қалмай, басқа да жобаларды іске асырып, жаңа тәжірибе алғысы келеді.
Әмір IT біліктілігін одан әрі арттырып, болашақта «DevOps» инженері болғысы келеді. Оның айтуынша, мектеп бітіргеннен кейін мансапты дамытудың екі жолы бар. Біріншісі – Еуропа немесе АҚШ-қа кетіп, жоғары оқу орнына түсу. Екіншісі – тәжірибе жинақтау. Еліміздегі ірі компаниялардан тағылымдамадан өтіп, содан кейін «Google», «Microsoft» сияқты халықаралық корпорацияда жұмыс істеуді армандайды. Ата-анасы оның жетістіктерін мақтан тұтады. Ол өзі де жеке басын қамтамасыз ете алатына риза. Ал достары данышпан көреді. Бірақ Әмір өз ісін ешқандай ерекшелікке баламайды. Өзінің цифрлық саладағы тәжірибесімен бөлісіп болған соң, сөзін «Табандылық пен ынта, еңбекқорлық арқылы әркім бұған қол жеткізе алады. Ең бастысы – бастаудан қорықпау және өзіңізге сену», деп аяқтады сөзін. Бұл сөзінің жаны бар.
