Коллаждарды жасаған – Алмас МАНАП, «EQ»
Осы аптада прокурорлар Павлодар қаласындағы мектеп директорларының бірі ірі көлемдегі бюджет қаражатын ұрлағанын әшкереледі. Ол білім ұясына әлдебір азаматты жұмысқа алып, соның атына ай сайын еңбекақы аударып отырған. Түптеп келгенде, әлгі қызметкер мектепте жұмыс істемеген. Облыстық прокуратураның дерегінше, мектеп басшысы осы заңсыз әрекеті арқылы мемлекетке жалпы сомасы 2,5 млн теңге шығын келтірген.
«Материалдар Сыбайлас жемқорлыққа қарсы қызметке жолданды. Қылмыстық кодекстің 189-бабы (сеніп тапсырылған бөтеннің мүлкін иемдену немесе жымқыру) бойынша сотқа дейінгі тергеп-тексеру жүргізіліп жатыр», деп хабарлады өңірлік прокуратурадан.
Бұған қоса жуықта Аққулы ауданындағы «Қызғалдақ» балабақшасының директоры мен бухгалтері мекемедегі жалақы мен үстемеақыларды заңсыз есептеу жолымен 62 млн теңгеден астам бюджет қаражатын қолды қылғаны туралы іс сотта қаралды. Белгілі болғандай, 2016-2023 жылдар кезеңінде балабақша директоры мен бухгалтер қызметкерлердің еңбекақысына қосымша жалақы мен үстемеақыны заңсыз белгілеп, ай сайын ол қаражатты өздері иемденіп отырған. Сот отырысында айыпталушылардың қылмысы куәгерлердің айғақтарымен, сот сараптамаларының қорытындыларымен және басқа да дерек-дәйектермен дәлелденді.
Облыстық соттан мәлімдегендей, бұл заңсыз әрекет ауыр сыбайлас жемқорлық қылмыстарға жатады, ол үшін қылмыстық заңда 7 жылдан 12 жылға дейінгі мерзімге бас бостандығынан айыру түріндегі жаза көзделген. Аққулы аудандық соты директордың зейнеткерлік жасын ескере отырып, 7 жылға бас бостандығынан айыру жазасын тағайындады. Бұған қоса мемлекеттік қызметте лауазымдарды атқару құқығынан айырылды. Ал бухгалтерді 8 жылға кесті. Дейтұрғанмен оның соттағы шын ниетпен өкінуін, мүліктік залалдың ерікті түрде ішінара өтегенін, асырауында кәмелетке толмаған төрт баланың, оның екеуі жас бала екенін ескере отырып, Қылмыстық кодекстің 74-бабының 1-бөлігі негізінде жазасын өтеуді кейінге қалдырды. Бухгалтерлік қызметпен алдағы 10 жыл ішінде айналыса алмайды.
Атап өтерлігі, прокурорлар бұған қоса Павлодар қаласының барлық мектебінде бейнебақылау камералары жазу функцияларынсыз жұмыс істейтінін анықтады. Олардың бейнемұрағаттарына кіру мүмкіндігі жоқ және полицияның жедел басқару орталығына қосылмаған. Бұл кемшілік 2023 жылы «Smart City Pavodar» жобасы аясында түзетілуге тиіс еді. Алайда жеткізушінің шарттық міндеттемелерді орындамауына байланысты әлі іске асырылмаған.
Павлодар облысы
