Аталған жоғары оқу орнының Жасушалық биология және геномика институтының ғылыми қызметкері Әсия Құсайынова 2013 жылдан бері молекулалық генетика саласында еңбек етеді. Ғалым радон мен асбест әсерінен туындайтын өкпе обыры патогенезінің молекулярлық-генетикалық аспектілерін зерттейді. Ол жас ғалымдарға арналған бағдарламаның арқасында бір бөлмелі пәтерге қол жеткізді.
«Өз баспанаңның болуы әрқашан тұрақтылық пен болашаққа деген сенімді ұялатады. Жас ғалымдарға арналған ипотекалық бағдарламаның ашылуы мені қатты қуантты. Бүгін біз тиімді шарттармен жеке баспана сатып алу мүмкіндігіне ие болдық», дейді ол.
Іс-шара барысында ғалымдарды университет ректоры Ерлан Сыдықов пен «Отбасы банкі» АҚ орталық филиалы директорының орынбасары Жанар Ізімбетова құттықтап, оларға несие алу туралы сертификат пен естелік сыйлықты табыс етті.
«Соңғы жылдары отандық ғылымға бөлінетін бюджет қаражаты бірнеше есе өсті. Мемлекет басшысының тапсырмасы аясында ғылым қызметкерлерінің әлеуметтік жағдайын жақсарту, оның ішінде тұрғын үймен қамтамасыз ету үшін жаңа мүмкіндіктер жасалып отыр. Ғылым және жоғары білім министрлігі және «Отбасы банкі» АҚ-мен келісімге қол қойып, жас ғалымдарды баспанамен қамтамасыз етудің арнайы бағдарламасын іске қосты», деді Е. Сыдықов.
Айта кетейік, былтыр жас ғалымдарға тұрғын үй сатып алуға арналған жеңілдетілген несиелеу бағдарламасы қолға алынды. Оған 40 жасқа дейінгі ғалымдар қатысады.
