«Бүгін – елімізде отбасылық құндылықтар дәріптелетін күн. Өнегелі, ұлағатты отбасыларға құрмет көрсету мақсатында өңірімізде көптеген іс-шара өтіп жатыр. Біздің ұжымымыздағы қызметкерлердің отбасындағы ең кішкентай сәби әріптесіміз Алпысбай Хонждың бөбегі болып шықты. Мінекей, кітапхана ұжымы жиналып, Айша есімді сәбиге сыйлық жасауға келдік», деп атап өтті С.Торайғыров атындағы облыстық кітапхананың креативті шығармашылық орталығының басшысы Марал Таженова.
Кішкентай Айшаға қазақтың ұлттық аспабы – үкілі домбыраны дәстүрлі әнші, республикалық байқаулардың жүлдегері Әсел Ботаева табыстады. Ертеде жасы үлкен, аузы дуалы адамдар мен өнері елден асқан жандар сәбилерге бата беріп, балалардың ғұмыр жасы ұзақ болуын тілеген. Балаға ырымдап сыйлық сыйлау, тіл-көзден сақтасын деп үкі, тұмар тағу бұлжымас дәстүрлердің бірі болған. Әз Наурыз қарсаңында халқымыздың осындай игі дәстүрлері қайта оралып жатқаны қуантады.
Кітапхана саласының ардагері, ақ жаулықты әже Хадиша Дәндібаева іс-шараға жиналғандарға шашу шашып, сәбиге батасын берді. «Шаңырақ күні еліміздің әр азаматына жақсылық, отбасының амандығын тілейміз. Әр шаңырақтың босағасының беріктігін, ұрпақтарының керегесі кеңейе бергенін, береке-ынтымағы артып, ырыс-дәулетінің таусылмауын тілейміз. Құтымыз шайқалмасын, қазанымыз оттан түспесін!» деп тіледі әжей.
Алты айлық Айшаның әкесі Алпысбай Хонж – С.Баязитов атындағы балалар оқу орталығының басшысы, ақын, сатирик. Ал анасы Гүлмерей мектепте сабақ береді. Жас әрі өнегелі отбасындағы балалардың үлкені – ұл. «Наурыз-базарлыққа» кенелген шаңырақ иелері кітапханашылар ұжымына ризашылықтарын жеткізді.
С.Торайғыров атындағы кітапхана Наурыз мейрамына арналған әр айшықты күнге ерекше шараларды арнап жатыр. Ұмытылған дәстүрлер фестивалі, Амал мерекесін атап өтсе, «Айна» галереясында ұлттық нақыштағы кескіндемелер мен қолданбалы өнердің туындылары қойылды. Киіз үй құру бойынша ел үлкендерінің шеберлік сағаты болды. Алдағы уақытта Наурыз мейрамына орай мұнда ұлттық ойындар – асық ату мен тоғызқұмалақтан сайыстар, «Үкілі қыз» байқауы ұйымдастырылады деп күтіліп отыр.
ПАВЛОДАР
