«Көрісу күні шуақты көктемнің алғашқы күндерімен сәйкес келеді. Мұны қазақ халқының даналығымен келген мейрам деп есептеймін, оның тарихы тереңде жатыр. Ертеде күзеуден қыстауға көшіп жүрген ата-бабаларымыз күн жылып, қар еріген шақта алыстағы ағайынмен сағыныса қауышып, амандық сұрасқан. Сондықтан да айтулы мереке адамның бойындағы ең ізгі қасиеттерді оятады, қоғамда, ұжымда бір-бірімізге деген сыйластығымызды арттырады», деген театрдың опера труппасының директоры, Қазақстанның еңбек сіңірген қайраткері Мейір Байнеш Көрісу күнінің халқымыздың ең көне дәстүрлерінің бірі саналатынын айта келіп, оның мән-маңызына да тоқталды.
Иә, Көрісу күнінің қазақ өмірінен, дүниетанымынан алар маңызы зор. Қытымыр қысты өткерген ағайын бұл күні бір-бірінің үйіне қонаққа барып, төрт құбыласын түгендеп, амандық сұрасады. Үлкендер жастарға бата беріп, «Жасың құтты болсын!», «Бір жасыңмен!» деген тілектер айтылады. Айтулы мереке, әсіресе, еліміздің батыс өңірінде кеңінен таралған. Бұл жақта оны «Көрісу айт», «Көрісу амалы» деп те айтып жатады. Осы ретте Оралда туып-өскен, қазіргі таңда «Астана опера» театры балет труппасының солисі болып еңбек ететін Сұлтанбек Ғұмар Көрісу күнін батыс аймақтарда қалай қарсы алатынын айтып берді.
«Бұл мереке маған бала күнімнен таныс. Оқушы кезімде 14 наурыз келгенде мектептер өзара араласып, түрлі іс-шара өткізетін едік. Жалпы, батыста Көрісу айт жақсы тойланады. Дәл осы күні барлық туған-туыс: аға-жеңгелер, келіндер, немере-шөберелер әулеттің үлкені саналатын ата-әжеміздің шаңырағына жиналып, хал-жағдай сұрасады, ақ дастарқан басында тілектерін айтады. Мұндағы мақсат – туысты біріктіру, бір атадан тараған ұрпақтарды бір-бірімен таныстыру, араларындағы достық пен татулықты арттыру. Дана халқымыз не істесе де, бәрін біліп істеген ғой. Қазір шетте жүрсек те, мүмкіндігіміз келгенше жақындарымызға хабарласып тұруға тырысамыз», деді Сұлтанбек Ғұмар.
Театр әртістері атап өткендей, Көрісу күні секілді ізгі мейрамдар адамдарды жақындастыра түседі. Ал ең бастысы осындай мерекелер арқылы біз өзіміздің ұлттық салт-дәстүрлеріміз бен құндылықтарымызды сақтап қаламыз және оның ұрпақтан-ұрпаққа жетуіне ықпал етеміз.
«Барлығыңызды келіп жеткен Көрісу күнімен шын жүректен құттықтаймын. Отбасыларыңызға тек ынтымақ-бірлік, молшылық, дендеріңізге саулық, бастарыңызға бақ-береке тілеймін. Бар қиыншылықты, уайым мен өкпе-ренішті артта қалдырып, жаңа жылға жақсылықпен, қуанышпен қадам басыңыздар. Әділетті Қазақстанымыз көркейіп, халықтың әл-ауқаты жылдан-жылға артып, әлемнің озық елдерінің қатарынан көріне берейік. Еліміз аман, жұртымыз тыныш болсын!», деп «Астана операның» жетекші солисі, Қазақстанның еңбек сіңірген қайраткері Жанат Шыбықбаев барша Қазақ еліне өзінің ақжарма тілегін жеткізді.
Бұл тамаша дәстүрден М.Горький атындағы академиялық орыс драма театры да қалыс қалмады. Театр директоры, Қазақстанның еңбек сіңірген қайраткері Айболат Жаудырдың бастамасымен театр төрінде «Сәлем, Наурыз!» атты көрме ашылып, ұжым қызметкерлері Наурыз мерекесінің тарихымен танысып, ұлттық ән мен биден шашу шаты.
«Наурыз – қазақ үшін қасиетті мейрам. Мұның еліміздің төрін мекен еткен өзге ұлт өкілдерін бір шаңырақ астында ұйыстырып, береке мен бірлікте жарасымды өмір кешуіне де ықпалы зор. Наурыз – мейірім мен қамқорлық, бауырмалдық пен ізгілік, амал мерекесі», деп атап өтті Айболат Жанғалиұлы.
Осылайша, елорданың мәдени мекемелері Көрісу күнін зор қуанышпен қарсы алып, театрларының төрінде Ұлыстың ұлы күнін тойлауды мерекелік көңіл күйде бастап кетті.
