Ауқымды және мағыналы жиынның алдында әр бағытта бірнеше секциялық отырыс өткізіліп, құрылтай мүшелерінің түрлі тақырыптағы пікірлері тыңдалды. Адам құқын қорғау, отбасылық зорлық-зомбылықтарға тосқауыл қою, мәслихаттардың рөлін арттыру, жергілікті қоғамдық кеңестерді нағыз халықтың өкілді органдарына айналдыру туралы нақты пікірлер айтылды. Мемлекет басшысы Қасым-Жомарт Тоқаев құрылтайда көпшілік күткендей еліміздің болашағы, тәуелсіздігіміздің баяндылығы жолында жасалынуға тиіс біршама бастаманы тілге тиек етті. Дінімізге, тілімізге қатысты біраз мәселе ашық айтылды.
Ата-бабаларымыздың тарихымен бірге жалғасып келе жатқан дінімізден айнымай, мазһабымыздың мақсатын бұзбай, ұлттық нақыштарымызға лайық киім үлгісінен таймай, Ислам дінінің талаптарына берік болуға болатындығын жеткізді. Шындығында да әр адамның иманы – жүрегі мен тілегінде. Сонымен бірге мыңдаған жыл бойы халқымыздың дәстүрімен бірге жасап келе жатқан Әбу Ханифа мазһабы ұстанымынан таймауымыз керектігін Президент ерекше айтты. Қазақ еліне исламды таратып, орнықтырған Ясауи бабамыздың рухани құндылықтарын дәріптеудің тарихи мәні зор екенін, оның кесенесіне әлемге әйгілі жәдігер ретінде ерекше көңіл бөлу керегін, тіпті жатқан жеріндегі көк тастың жамылғышын қалпына келтіру туралы тапсырмасы елді елең еткізетін жаңалық болды деп есептейміз.
Ал қазақ тілі қазіргі заманға лайық экономика, өндіріс, техника мен технология тіліне айналуға барынша мүмкіндігі бар екенін Президент анық айтты. Мемлекет басшысының бастамалары арасынан халқымыз үшін, әсіресе жастарымыз үшін бес жаман әдеттен құтылып, алты құндылыққа ұмтылу қажеттігі туралы бағдарламалық сөздерін ерекше атап өткім келеді. Үкімет пен үкіметтік органдарға өздерінің жұмыстарын да, мемлекеттік бағдарламаларды да осыған сәйкестендіру туралы тапсырмалар да берді.
Осы айтылғанның барлығы Адал адам формуласының қағидаттарына толық сәйкес келеді. Ол – әділетті Қазақстанды қалыптастырудың айқын жолы.
Әли БЕКТАЕВ,
Сенат депутаты
