Қар көп жауған жылдары көгілдір көктем өзімен бірге біршама қиындықты ерте келетіні бар. Облыс орталығының іргесіндегі Застанционный кенті қасат қарға мелтектеп, тұрғындардың ауласы толып, жаяу жүргіншінің жолы тарылып қалады. Мұндай жай әсіресе жалғызілікті адамдар үшін қиын. Кенттегі мектеп оқушылары қолы қысқа адамдарға көмектесіп жатыр. Ізгілікке толы жас жүректердің шарапатын көріп жатқандар да аз емес.
–Үш жылдан бері мүгедекпін. Балаларым Ресейге көшіп кеткен, – дейді кент тұрғыны Светлана Горст, – кейде көршілерім де көмек қолын созып жатады. Азық-түлік әкеліп береді, дәрі-дәрмекке де мұқтажбын. Ал ауладағы қарды тазалауға шамам келмейді. Тазаламай тағы болмайды. Көлкіген көп су ішке еніп кетуі де мүмкін. Ауладағы қар бір еріп, бір қатып, көк мұзға айналып қалды. Не істерімді білмей отыр едім, мына айналайын балалардың келіп, тазалап жатқанын көргенде жүрегім елжіреп кетті. Алты ай қыс аяздан тоңған жүректі қаршадай балалардың ізгілікке толы жүрек лүпілі жылытып жатыр.
Кейуана айтса айтқандай, өткен жылғы көктемде еріген қар суы үйдің ішіне де еніп кетсе керек. Сәл еңісте тұрғандықтан жол жиегіндегі жылғалардан сыздықтап аққан қызыл судың алдын алып тазаламаса, құлдилай құлап, лап бергелі тұр.
– Біз әжейдің ауласын тазалап бердік, – дейді №14 мектептің оқушысы Азамат Стал, – жалғыз осы үйдің ғана емес, әлі де бірнеше үйге көмек көрсетуіміз қажет болып тұр.
Қала әкімшілігінің ақпаратына қарағанда, кенттегі қар тазалау қыс бойы жүргізіліп келеді. Күні бүгінге дейін 5 мың текше метр қар шығарылыпты. Көктем сайын бейнетті белшесінен кешетін кенттің жерасты суы көлкіп тұр. Қар суының бірден сіңіп кетпейтіні де сондықтан. Мұндай кезде тиянақты жұмыс істемей тағы болмайды. Үлкендердің үлгермей жатқан ісін балалардың жалғастырғаны жарасымды көрінеді екен.
Көкшетау
