Суретті түсірген – Руслан Кадыров
Әр ұлттың дәстүрлі құндылықтары – сол ұлттың қолтаңбасы секілді, бұған әдет-ғұрпын, салт-санасын, киімін қосуға болады. Жыл санап жұрт ішінде сұраныс артқанымен, белгілі бір мейрамдарда ғана тұтынатыны бізді қынжылтады. Ел Президентінің «Ұлттық киімнің өзі – ұлт мәдениетінің жарқын көрінісі. Сондықтан ұл-қыздарымыз ұлттық киімді Наурыз мейрамында я болмаса басқа мерекелерде жиі киіп жүрсе, керемет болар еді», деуі де бұл істің мәселеге айналғанын аңғартады. Дегенмен өңір-өңірлерде рухы биік, баба болмысынан ажырамаған ағайын бар. Біз мысалға алған «Jetisy» басылымы көпке үлгі.
«Ата басылым ұлттық киім кию осыдан бес-алты жыл бұрын басталып, Наурыз айының басынан сәуірге дейін жалғасып, жарасым тауып, дәстүрге айналып кеткен. Күле қарағандар да, сынай қарағандар да, ұната қарағандар да болды. Мұндай пікірлер – шолақ ойлап, асығыс саралаудан туған ойдың нәтижесі. Себебі ұлттық киімге деген құрметіңіз ішкі мазмұныңыздың қандай екенін білдіреді. Жан дүниемізді қазақты сүю сезімі ерекше билесе, онда кез келген ұлттық құндылыққа бейжай қарамайтын едік. Жаратушы бізді «қазақ» қылып жаратқан екен, ендеше басқа ұлттан тіліміз, салт-дәстүріміз, әдет-ғұрпымыз, ұлттық тағамдарымыз бен киімдеріміз арқылы ерекшеленіп тұрмаймыз ба?», дейді басылым басшысы Жұматай Оспанұлы.
Жалпы, газет ұжымының ауызбіршілігі, кішінің үлкенге ізеті, үлкеннің кішіге құрметі көңіл сүйіндіреді. Апталық жұмыстың соңғы күні «Жұма шай» ұйымдастырып, рухани әңгіме айтылады. Құран оқылып, есті естеліктердің тиегі ағытылады. Бұл да ұлттың ұстынына айналған үнпарақтың келбетін ажарландыра түсетін әдет.
«Қазақша киінсек қана ұлттық болмысымыз бен рухымыз асқақтап тұрады деген біржақты ойдан аулақпын. Сырт көз сұғын көп қадайтын айтулы орындарда, әлемдік додалар мен алыс-жақын шетелдерге баратын ресми сапарларда, мемлекеттік құрылымдарда заманауи үлгіде ұлттық киім киіп жүру мәртебемізді көтермесе, көлеңкесін түсіре қоймас. Әйтпесе, аламанға түсетін бәйге атының үстіне жапқан жабудай, әз Наурыз мерекесінде ғана киіп, қалған уақытта кәдеге жаратпау ұлттығымызға сын болмай ма?! Ендеше, мүмкіндігімізше қазақы нақыштағы киімді киіп жүруді дәстүрге айналдырғанымыз жөн», дейді Ж.Оспанұлы.
Берекесі жарасқан «Jetisy» газетінің ұжымы өңірдегі өзге де салаларға бастама болып, қазақы киім киюге жол көрсеткендей. Қазір Б.Құранбек атындағы Журналистер үйінде ұлттық киім кию трендке айналып келеді.
Жетісу облысы
