Суретті түсірген – Павел Михеев
Журналист шаңғышылардың халықаралық клубы бар, бұл SCIJ (The Ski Club of International Journalists) деп аталады. Жыл сайын әр елде отырысы өтеді. Биылғы 69-отырысты өткізу мәртебесі Қазақстанға бұйырды. Әлемнің әр қиырындағы 30-ға тарта елден келген 150-ге жуық журналист апта бойы Алатау бөктерінде аялдады. Жалпы, журналист шаңғышылардың халықаралық клубының отырысын өткізу тек жарыс ұйымдастырып, шүлен таратқандай мойындарына медаль іліп қоя беру емес. Басты мақсат – туризмді дәріптеу. Алматыға ат байлаған журналистер апта ішінде Шымбұлақтың бөктерінде сырғанап қана қойған жоқ, алды Түркістанға дейін қыдырып барып еліміздің көрікті жерлерін тамашалап, тәу етіп қайтты. Қазақтың салт-дәстүрі мен әдет-ғұрпына қанықты, мәдениеті мен руханиятын көрді.
Халықаралық клуб отырысының салтанатты ашылу рәсімінде сөз алған Туризм және спорт вице-министрі Серік Жараспаев бұл іс-шара шетелден келген меймандарға еліміздің туристік орындарын аралатып таныстыруға тамаша орай екенін айтты. «Шымбұлақ» тау-шаңғы кешеніндегі келелі кеңес барысында түрлі кездесу, жиын да өтіп, ұлттық тағамдарымызды таныстыру, елдің өзегі саналатын құндылықтар да айтылды. «Kazakh Tourism» ұлттық компаниясы бас серіктес болып, Алматы қаласының әкімдігі қолдап өткізген ауқымды іс-шараның шарапаты ішкі туризмді түлетуге тиетіні сөзсіз.
Шаңғышы журналистердің мүшесі Словениядан келген Альбина Подбевсектің жасы – 82-де. Шаңғыны бойжеткен шағынан тебеді екен. Сексеннің сеңгіріндегі шаңғышы әжеймен тілдескенімізде«Шымбұлақ жөнінде бас бармағын көрсетіп, ерекше әсер алғанын аңғартты.
«Словенияның Триглав ұлттық паркінің территориясындағы Вогель тау-шаңғы курорты Шымбұлаққа қарағанда әлдеқайда аласа екен. Осындай мұзарт шың басынан етекке қарай құлдилап түсу қандай керемет. 82 жасқа келіп Қазақстанның көркем табиғатымен тұңғыш танысып отырмын. Маған ерекше әсер етті. Еуропа елдерінде, оның ішінде біздің Триглав шыңының бөктеріне қар ерекше қалың жауады. Сырғанау маусымы кей жылдары сәуірдің соңына дейін созылады. Мұнда да сондай ұқсастықты байқадым, Алматы қаласында күн жылынып, көктемнің лебі еседі, ал Алатаудың бөктерінде сірі қары сол күйі жатыр. Алдағы уақытта да дәм тартса, Қазақстанға қыдырып келуді жоспарлап отырмын. Басқа елдердің тау-шаңғы курорты қаладан тым шалғайда орналасқан. Тіпті 70-80 шақырым жер өндіріп демалыс орнына жетесіз. Ал Шымбұлақ Алматының дәл иегі астында, аса қашық та емес екен», деді Альбина Подбевсек.
SCIJ Қазақстан клубы 2013 жылдан бері «Шымбұлақ» тау-шаңғы кешенімен меморандум жасасып, тізе қосып талай шаруаны жүзеге асырды. Соның ішіндегі елеулісі – осы дүниежүзінің журналист шаңғышыларын жинап өткерген басқосу. Бұлай деуге негіз де жоқ емес. Бұған дейін халықаралық клубтың жыл сайынғы отырысы дамыған елдердің таңдаулы курортты кешендерінде өткізіліп келді. 1955 жылдан бері 69 мәрте ұйымдастырылды. Пиреней сілемдеріндегі Baqueira-Beret тау-шаңғы курортында (Испания), 2006 жылы Турин қысқы Олимпиадасын өткізуге үлесі тиген Италияның Sestriere кешенінде, Францияның Val Cenis Vanoise, Val d’Arly кешендерінде, Ресейдің Роза Хутор, Болгарияның Пампорово сынды таулы өлкесіндегі курортты кешендерінде жоғары деңгейде өтті. Ал былтыр Канаданың әйгілі Marble Mountain шипажайында ұйымдастырылды.
«Шымбұлақ» компаниялар тобының бас директоры Ринат Әбдірахманов журналист шаңғышылардың халықаралық клубы Алматыға аялдауы еліміз үшін зор мәртебе екенін айтты.
«Біз бұл іс-шараны өз деңгейінде өткізуге бірнеше жыл әзірлік жүргіздік. SCIJ Қазақстан клубына мүше журналистердің Шымбұлақ екінші үйі саналады. Жыл сайын қысқы маусым ашылғаннан бастап журналистер де көпшілікпен бірге сырғанап демалысын оңтайлы өткізіп жүр. Дүниенің әр қиырынан келген журналистерге қолайлы сырғанау соқпағын әзірлеуде де аз жұмыс атқарылған жоқ. Мұның барлығы да елімізге турист тартудың қамы үшін жүзеге асырылды», деді Р.Әбдірахманов.
Жетпісжылдық тарихы бар журналист шаңғышылардың халықаралық клубына Қазақстан 2013 жылдан бері мүше.
«Біз алғаш 2012 жылы Түркияда өткен клубтың халықаралық жиынына қонақ ретінде қатыстық. 2013 жылы Италия жерінде ресми түрде мүшелікке қабылдады. Сол кезде SCIJ Қазақстан клубының мүшелігінде үш журналист қана бар еді. Он жылдың ішінде қатарымыз артып, 50-ге таяды. Халықаралық клубтың кезекті жиынын Қазақстанда өткізуге ұсыныс жолдап талпыныс жасадық. Нәтижесінде, Қазақстанда қысқы туризмді насихаттаудың зор мүмкіндігі туды. Журналист шаңғышылар өз еліне барған соң Қазақстан жайында әсерін бөлісіп, айналасына айта жүрері сөзсіз. Бұл – біздің он жылдың бедеріндегі зор табысымыз», деді SCIJ Қазақстан клубының президенті Ирина Баженова.
Игі іс-шараға жиналған журналист шаңғышылар арасында бейресми әлем чемпионаты саналатын халықаралық турнир де ұйымдастырылды. Жас ерекшелігіне қарай бірнеше топқа бөлініп бәйгеге түскен үздіктер арасында әріптестеріміз де бар. Тау-шаңғы сайысынан Егор Ильин күміс медаль иеленді. «Алатау» шаңғы-биатлон кешенінде (Талғар ауданы) өткен шаңғымен жүгіру додасында жерлестеріміз топ жарды. Сұңқар Қарабалин мен Егор Ильин өз топтарында қара үзіп келсе, Андрей Кукушкин қола медальға қол жеткізді. Әйелдер арасындағы сайыста Наталья Качалова күміс жүлдегер атанды. Шаңғы спортымен кәсіби шұғылданып, мансабын аяқтаған соң комментаторлыққа бет бұрған италиялық Луиджи Бреччиароли де Қазақстанға қайта айналып соғатынын айтты. Альпінің аңғарында шаңғы тебетін комментатор Шымбұлақта шиырлаған ізі туралы жылы лепесін «еліме жеткіземін» деп кетті.
