Фото: Inbusiness.kz
Ұлттық қордан республикалық бюджетке трансферттерді қамтамасыз ету үшін наурызда 748 млн долларға валюта сатылды. Ұлттық қордан сату үлесі жалпы сауда-саттық көлемінің 19%-ын және күніне 44 млн доллардан аспайтын мөлшерді құрады.
Ұлттық банк Ұлттық қордың қаражатымен операция жүргізу кезінде нарықтың бейтарап қағидатын сақтайды. Бұл шетел валютасын ұдайы және біркелкі сатуды білдіреді. Бұл тәжірибе Ұлттық қордағы операциялардың валюта нарығына әсерін барынша азайтуға мүмкіндік береді. Ұлттық банк наурызда БЖЗҚ зейнетақы активтерінің валюталық үлесін 30% деңгейінде ұстап тұру мақсатында биржадағы сауда-саттықта шетел валютасын сатып алуды жалғастырды. Оның жалпы сомасы 500 млн долларды немесе нарықтың жалпы көлемінің шамамен 13%-ын құрады», делінген Ұлттық банк хабарламасында.
Сондай-ақ ҰБ наурызда валюталық интервенциялар жүргізген жоқ деп мәлімдейді. Республикалық бюджетке трансферттер бөлуге Үкіметтің алдын ала болжамды өтінімдері бойынша 2024 жылғы сәуірде ҰБ Ұлттық қордан 1 млрд доллардан 1,1 млрд долларға дейінгі мөлшерде валюта сатылуын күтеді. 2024 жылғы сәуірде БЖЗҚ зейнетақы активтерінің валюталық үлесін ұстап тұру үшін 450 млн доллардан 500 млн долларға дейінгі мөлшерде валюта сатып алу күтіледі.
«Ұлттық банк ашықтық қағидаты аясында валюта нарығында жүргізілетін барлық операция туралы ақпаратты толық ашып көрсетеді. Қысқамерзімді перспективада теңгенің динамикасы нарыққа қатысушылардың күтулеріне, тоқсандық салық төлемдеріне, әлемдік нарықтардағы ахуалға және геосаяси жағдайдың өзгеруіне байланысты болады. Ұлттық банк теңгерімсіздіктің жинақталуын болдырмайтын және алтын-валюта резервтерінің сақталуын қамтамасыз ететін икемді бағам белгілеу режімін ұстана береді», делінген мәлімдемеде.
