«Техникалық және кәсіби білім беретін оқу орындары еңбек нарығының нақты сұранысына бейімделуі және еліміздің жаңа экономикалық бағдарының міндеттеріне сай болуы керек» деген Президент сөзінің астарында үлкен мән жатқаны рас.
Байзақ ауданында орналасқан №3 Байзақ колледжінде техникалық және кәсіптік білім беру мәселесі назардан тыс қалған емес. Білікті кадрлар орта буын мамандарды даярлауға білек сыбанып кіріскен. Ізденіс ізіне түскен шәкірттер мен оқытушылар ойлап тауып жатқан жаңалықтар да жеткілікті. Білекке емес, білімге сенген шәкірттер бәсекеге қабілетті маман ретінде қалыптасуды көксейді.
Таяуда ғана колледждің «Автомобиль көлігіне техникалық қызмет көрсету, жөндеу және пайдалану» мамандығының өндірістік шебері Асхат Сүйінбеков пен колледж студенті Әбдімомын Исмойлов бастаған қыз-жігіттер өндірістік сабақ барысында «Д-22» шағын тракторының сұлбасын құрастырып шығарды. Дерекке сенсек, бұл тракторды шаруашылық жұмыстарға пайдалануға болады екен. Тіпті шаруа қожалық басшылары да жаңа техниканың тиімділігі зор екенін айтыпты.
«Ұстаз бен шәкірттің бірлесе атқарған жұмысының нәтижесінде пайда болған шағын трактордың ауыл шаруашылығы жұмыстарын жеңілдетуге тигізетін пайдасы зор. Көз үйренген үлкен техниканың көп жағдайда жылыжай, саяжайлар және өндірістік қожалықтардағы жұмыстарды игеруге мүмкіндігі бола бермейтінін уақыттың өзі дәлелдеп отыр. Мұндай кезде шағын тракторлар шаруа азаматтың сенімді серігіне айналатыны даусыз. Оған еш күмәніміз жоқ.
Сынақ жұмыстары кезінде су жаңа шағын трактор техникалық қауіпсіздікті сақтау, шаруаның қаржысы мен уақытын үнемдеуде өзінің тиімділігін көрсетті. Трактордың басқару механизмдері жеңіл автомобильдердің құрылғыларынан құрастырылған. Бұл да бір жаңалық қой», дейді колледж әдіскері Ләззат Хибатова.
Оның айтуынша, «Д-22» шағын тракторы сағатына бір тонна жүкті тасымалдауға қауқарлы екен. Ал қозғалтқыштағы мотоблок ажыратқышы басқару тетігіне орнатылған. Техниканың жанармай құю багіне үш литрге дейін май құюға болады. Жалпы алғанда, жаңа трактор үнем тұрғысынан үлкен техникаларға қарағанда әлденеше есе тиімді көрінеді. Аз шығынмен көп жұмысты тындыруға мүмкіндік туғызады.
«Шағын трактордың әлеуеті жоғары екенін жұмыс кезінде байқап көрдік. Мұның «УД-2» қозғалтқышында сегіз аттың күші бар. Сондай-ақ техниканың шығыны бір сағатта 1,5 литр жанармайға тең екенін айта кеткен жөн. Жалпы, құрылғының агрегаттармен қосқандағы салмағы бар болғаны 250 килограмды құрады. Тракторды іс барысында сынап көрген кезде шаруалардың барлығы шағын техниканың тиімділігі зор екенін тілге тиек етті», дейді ол.
Жамбыл облысы
