Ақтоғай ауданында күрделі жағдай қалыптасқан. Осы аптаның басында Жалаулы аулында жергілікті ауқымдағы табиғи сипаттағы төтенше жағдай жарияланды. Мұнда 14 үйді топан су басып қалды. Жалаулы аулы ойпаң жерде орналасқандықтан, жағдай күрделі болып тұр. Су ортасында қалған баспаналардың тұрғындарына жергілікті билік хал-қадірінше көмектесіп, оларды уақытша туыстарының үйіне орналастырды. Малдары құрғақ жерге айдап шығарылды.
Аумақтағы Шолақсор аулы да қауіп көзінде қалған болатын. Жергілікті атқарушы органдардың өкілдері мен ТЖД қызметкерлері күш біріктіріп, ауылды су басудан аман алып қалды.
«Шолақсор аулының айналасындағы топырақ үйіндісі, бөгет топырақпен және құм толтырылған қапшықтармен нығайтылды. Ауылға кіретін жолдың айналасы да биіктетілді. Осылайша, тұрғын үйлер мен жергілікті ұйымдарды су басуға жол берілмеді. 2 техника және 2 жүзу құралы жұмылдырылды. Аталған елді мекендегі су деңгейінің өзгеруін ТЖД-ның 6 қызметкері бақылап отыр. Барлық тартылған күш пен құрал қазір Жалаулы аулына бағытталды», деп хабарлады өңірлік төтенше жағдайлар департаментінен.
Кешегі жағдай бойынша автокөлік жолдарының бір бөлігінде және Павлодар, Ақтоғай, Тереңкөл, Успен, Ертіс, Шарбақты аудандары бойынша жалпы саны 10 учаскедегі жағдай бақылауда тұрғаны белгілі болды. Облыс бойынша су тасқынына қарсы іс-шараларға барлығы 435 адам, 145 техника, 47 мотопомпа, 2 жүзу құралы жұмылдырылған. Өткен тәулікте 108 876 текше метр су сорылып, 2 850 қап, 150 тонна инертті материал төселді.
Білім беру басқармасы Ақтоғай ауданына қарасты Шұға, Жалаулы ауылдарының оқушылары төртінші тоқсанды қашықтан оқи бастағанын хабарлады. Жалпы саны 104 бала онлайн түрде білім алып жатыр.
Өңірлік төтенше жағдайлар департаменті бастығының орынбасары Олег Трещевтің айтуынша, қарғын су қазіргі уақытта облыстың оңтүстік аймақтарына қарай ойыса түскен. Кейінгі күндері топырақтағы тоңның беті жіпсіп, су жақсы сіңе бастаған. Әйтсе де солтүстіктегі, Ресеймен шекаралас ауылдарға қауіп төнуі мүмкін. Бұл өңірлерде қар әлі толық ери қоймаған. Елді мекендерден қар шығарылып, арықтар қазылып жатыр.
Бүгінде арнайы комиссия барлық су басқан үйге келтірілген залалды бағалау жұмыстарына кірісті. Комиссия жұмысының қорытындысы бойынша барлық зардап шеккендерге облыс бюджетінің резервінен және бюджеттен тыс қаражат есебінен көмек көрсетіледі.
Железин ауданындағы Михайловка, Веселая роща ауылдарында құтқарушылар қызыл суды арық қазу арқылы бұрып жатыр. Барлығы 6 жедел топ пен 60-тан аса техника бар.
«Кейінгі күндері Тереңкөл ауданының Томарлы және Железин ауданының Веселая роща, Михайловка ауылдарына даладан аққан судың ағыны едәуір өсті. Оларды тосқауыл бөгеттер жасап, судың ағысын бұруға арналған арықтарды қазу арқылы тоқтату мүмкін болды. Бұл ауылдардағы үйлерді су басу қаупі жойылды, бірақ жұмыс тәуекелдер толықтай жойылғанға дейін жалғасады», деп атап өтті өңір басшысы Асайын Байханов.
Павлодар облысы
