Іс-шараның мақсаты – еліміздің өсіп-өркендеуіне үлес қосқан ардагер аналарымыздың қоғамдағы беделін көтеру, оларға қолдау көрсету. Шараға Қарасай ауданынан – 3, Жамбыл ауданынан – 1, Алматы қаласынан 1 әжелер ансамблі қатысып, бақ сынады. Әр ауылдың намысын арқалап келген әжелер тамылжыта ән шырқап, көпшілікті тамсандырды. Аудандық әжелер ансамблінің байқауы «Алматы облысы музейлер бірлестігінің» басшысы Ержан Тоқтарұлының құттықтауымен ашылды.
– Иә, ана бір қолымен бесік тербетсе, бір қолымен әлемді тербетеді. Ал ұлттың алтын қоры – ана мен бала. Сондықтан бұл байқауды көпке үлгі деп білемін. Өйткені әжелер салған дана жолда ұрпақтар өседі, жақсы тәлім-тәрбие алады, – деді бірлестік басшысы.
Байқау ережесі үш кезеңнен тұрды. «Өнерлі неткен әжелер» атты алғашқы кезеңде қатысушылар өз өнерлерін көрсетсе, «Бесік жыры – басты жыр» деп аталатын екінші кезеңде заманауи немесе өздері шығарған бесік жырын әуелете шырқады. Ал «Ұмыт болған ұлттық салт-дәстүрлер» кезеңінде ұмытыла бастаған салт-жоралғыларымыз бойынша көрініс көрсетілді. Сонымен қатар әндер түрлі музыкалық аспаптардың сүйемелдеуімен жанды дауыста орындалды. Ән бүкіл сана-сезіміңді баурап алып жеткізе алатын құдіретті қасиетке ие. Ал әжелердің салған әндерінің мақамы да, мазмұны да мүлдем бөлек болды. Бұлбұлдай сайрап, гүлдей құлпырған ақ жаулықтылар сахнаның сәнін келтірді. Ансамбльдің құрамы 10-12 адамнан кем болмады. Қатысушы әжелердің жас ерекшелігі 65 жастан жоғары болғаны ескерілді. Әжелер байқауының өткізілуіне бастамашы болған, басты ұйымдастырушысы – «Анаға құрмет» музейінің меңгерушісі Гүлнар Бақытқалиқызы.
Байқауға «Анаға құрмет» музейінің ұйымдастырушысы, профессор, ардақты ұстаз Бақыт Шпекпаева, ардагер журналист, киелі кимешекті насихаттаушы Аршагүл Тойбаева, ұстаз Зәуре Накипова, «Алматы облысы музейлер бірлестігінің» басшысы Ержан Тоқтарұлы төрелік етіп, әжелерге ыстық ықыласын білдірді.
Байқаудың нәтижесінде бас жүлдені Райымбек ауылдық округінің «Дариға дәурен» әжелер ансамблі алса, 1-орынды Үмбетәлі ауылының «Бөпежан» әжелер ансамблі иеленді. 2-орынға Шамалған ауылдық округінің «Ақ әжелер» ансамблі лайық деп танылса, үздік үштіктен Елтай ауылдық округінің «Асыл әжелер» ансамблі көрінді. Күлиман ана атындағы арнайы жүлде «Алматы қаласының белсенді өмір сүру орталығының» әжелеріне бұйырды. Осылайша, байқауда әжелер әуенді әндерді нақышына келтіре орындап, саз өнерінің иірімін ұштастырды. Болашаққа ұлттық құндылықтарымызды сырын бұзбай жеткізу дәл осындай шаралардан бастау алады.
Ақерке АМАНТАЙ,
«Анаға құрмет» музейінің ғылыми қызметкері
