Фото: primeminister.kz
Үкіметке Батыс Қазақстан облысында жүргізілген жұмысты Атырауда да жан-жақты ұйымдастыру тапсырылды, онда су тасқынына қарсы алдын алу іс-шараларын, жеткізілген инженерлік техникаларды ескере отырып, 14 өңірден жұмылдырылған әскери қызметшілер мен құтқарушылар ауқымды шығынға жол бермей, су тасқынын еңсеруге мүмкіндік берген еді.
БҚО-дағы жұмысқа 11 мыңнан астам адам мен 2 мыңға жуық техника тартылып, ұзындығы шамамен 150 км болатын қорғаныс бөгеттері салынды, 1,3 млн құм толтырылған қапшық төселді.
Орал қаласында 18 тұрғын үй алабын бойлай тұрғызылған бөгеттер қауіпсіздікті толық қамтамасыз етіп, қаланың тұрғын үйлері мен әлеуметтік нысандарына су жеткен жоқ. Су басқан бау-бақша серіктестіктері мен Жайық өзені алқабында орналасқан бірқатар үйдің тұрғындары алдын ала қауіпсіз жерге көшірілгені мәлім.
Батыс Қазақстан облысы әкімдігінің мәліметінше, бүгінде 909 үйдің тұрғындары өз үйлеріне қайта оралды. 5 мыңнан астам мал басы қауіпсіз жерлерге айдалған.
Бүгінгі таңда облыстық жедел штаб пен су тасқыны салдарын жою жөніндегі комиссия 8 мыңға жуық өтінім жинап, мыңнан астам үйге бағалау жұмыстарын жүргізген. 1672 отбасы 100 АЕК мөлшерінде біржолғы төлем алды. Зардап шеккендерге көмек көрсету жұмыстары жалғасып жатыр.
«Су тасқыны жағдайы тұрақталып келеді. Батыс Қазақстан облысында су тасқынының шарықтау шегі болып өтті. Мұнда жұмысқа тартылған барлық бөлімшелердің үйлесімді жұмысын атап өткен жөн. Бірлескен іс-әрекеттердің арқасында 84 елді мекенді су басуға жол берілмеді, сондай-ақ өңірдегі су тасқыны салдары барынша азайтылды. Қазір үйлерді қайтадан су басу қаупі сейілді», деген Олжас Бектенов Төтенше жағдайлар, Қорғаныс, Ішкі істер министрліктері мен Ұлттық қауіпсіздік комитетінің және жергілікті атқарушы органдардың, ұйымдардың барлық қызметкерлері мен әскери қызметшілеріне, еріктілерге, тасқынға қарсы шараларға қатысқан барлық жанашыр азаматтарға алғысын білдірді.
Бүгінгі күннің басты міндеті — Атырау облысын су тасқынынан қорғануға дайындау. Күн сайын Жайық өзенінің су деңгейі көтеріліп келеді. Қауіпті белгіге дейін шамамен 100 см қалды.
«Қазір үлкен су көлемі Атырау облысына қарай ағып жатыр, алдағы күндері шарықтау шегі күтіліп отыр. Барлық күштерді жұмылдырып, басқа өңірлерден қосымша күш тартқан Батыс Қазақстан облысының тәжірибесін пайдаланған жөн. Су деңгейінің сағаттық мониторингін қамтамасыз етіп, қорғаныс бөгеттерінің ұзындығы мен биіктігін ұлғайту қажет. Біз өңірді қорғап, су тасқынына жол бермеуіміз керек», деп атап өтті Үкімет басшысы.
Бүгінде Атырау облысында апаттық-құтқару жұмыстарын жүргізу үшін 13 мыңнан астам адам және 1 200-ден астам техника жұмылдырылған. Өңірде 500 км-ден астам бөгет салынды, оның ішінде Атырау қаласындағы тұрғын алаптардың бойында – 242 км, 4,8 млн-нан астам қапшықтар пайдаланылды. Өзен сағасында, Каспий теңізінде тереңдету жұмыстары жалғасып жатыр: 1 408 м қазылып, 11 538 м3 топырақ алып тасталды.
Қорытындылай келе, Үкімет басшысы негізінен ел бойынша су тасқыны қаупі сейілгенін атап өтті.
«Президент табиғи апаттан қираған үйлерді қалпына келтіру, зардап шеккен азаматтарды қалыпты өмірге қайтару бойынша басым міндет қойды. Біз барлық күш-жігерімізді әлеуметтік нысандарды, тұрғын үйлер мен инфрақұрылымды салуға және жөндеуге, адамдарға өтемақы төлеуге бағыттауымыз керек. Барлық атқарылатын шаралар нақты әрі үйлесімді түрде жасалуы керек. Әкімдіктер тұрақты түсіндіру жұмыстарын жүргізіп, зардап шеккен тұрғындармен кездесуі керек», деп қорытындылады Премьер-министр.
